Ayera durante un conferencia di prensa cu Minister di Husticia, Andin Bikker a ofrece pa e medionan local, el a splica cu lo sigui cu medidanan extra di siguridad, cu a aplica caba na instituto coreccional di KIA y aumento di castigo pa personanan cu ta yuda un persona scapa di husticia of ta duna un refugio p’e.

Bikker a anuncia cu den ultimo siman nan a pone un ekipo special di DOW, cu a yuda pa aplica e plan di emergencia cu nan ta trahando aworaki, pa loke ta trata e infrastructura na KIA.

Tocante esaki, el a sigura cu nan tabatin un plan pa ehecuta desde basta tempo caba, pero door cu tin un contratista so trahando eynan, e retonan cada siman tabata mas grandi. P’esey, DOW a presenta dos ekipo cu a traha tur dia y fin di siman pa haci tur e reconstruccion un tiki mas lihe.

Di mesun manera, Bikker a informa cu a instala luz permanente full rond di e compleho cu antes tabata hopi scur. Tambe a staciona e Mobile Command Center y KPA cu sistema adicional di camara sofistica y asina mes el a bisa cu a pone patruya adicional di KPA y CEA.

A revisa e structura di trabou interno pa atende cu e falta di personal y e siman aki Bikker a comenta cu nan lo cuminsa cu un estudio di bewaker pa haya un ekipo nobo pa KIA. Ademas a pidi ayudo di Marina Real pa loke ta trata di pone na disposicion un kilometer di prikkeldraad militar, pa asina dificulta e huida di e personanan den prizon.

Asina mes, Bikker a duna di conoce cu e luna aki nan ta spera di haya proposicionnan pa e sistema di tracking di prizonero, cual ta un sistema cu tur prizonero lo bay haya un enkelband, pa asina por sa na unda e prizoneronan ta na tur momento, si nan ta haci e intento di huy e enkelband tin un sistema di track via GPS.

Esey ta forma parti di un solucion tecnologico pa cu e retonan cu tin relaciona cu e sucesonan ultimo na KIA, Bikker a sigura.

E modernisacion di ley pa loke ta trata castigo pa personanan cu ta yuda prizoneronan cu ta huy for di prizon, Bikker a splica cu esaki ta pa descurasha e tipo actividad aki; pa motibo cu nan a ripara cu entre e huida di prizonero, pafo tin personanan cu a duna asistencia y esey ta algo contra ley.

Tambe, minister di Husticia a informa cu ta na caminda pa haya un proposicion den e cuadro financiero pa por cuminsa cu e instituto coreccional nobo y e plan di emergencia pa loke ta trata infrastructura existente cu nan a pone ‘in place’ na e momentonan aki y asina tambe nan kier yega na un instituto nobo cu lo cumpli cu exigencia Europeo, cu personal nobo y exigencianan di aña 2019.