Minister Bikker: 3% di 1000 peticion pa asilo honra; 23.8 miyon Euro ‘no ta bay riba ningun cuenta di banco’

Te na momentonan actual tin mas o menos 1000 peticion di asilo cu pais Aruba a ricibi. Di e 1000 peticionnan solamente 3% a keda honra te awo, segun minister di husticia Andin Bikker (POR).

Despues cu Aruba a ricibi asistencia tecnico di Hulanda pa trata peticionnan di asilo na un manera mas acelera, tin un cantidad di mas o menos mil peticion cu gobierno di Aruba ta atendiendo cune. Mayoria peticionario di asilo (asielzoekers), segun e mandatario, no ta bin na remarke pa e status di refugiado den sentido di e tratado di refugiado.

Esaki ta mustra e echo cu ‘gran mayoria, si no ta tur’ peticion cu ta bay corte, ta perde nan caso. Pues di e manera aki e mandatario ta trece dilanti cu esnan cu berdaderamente ta bin na remarke pa un status conforme e tratado ta ‘hopi chikito’.

23.8 miyon Euro di Hulanda pa asilo ‘no ta bay riba niun cuenta di banco’
Ta posibel cu desde cu e noticia a sali cu Aruba y Corsou lo haya un suma di 23.8 miyon Euro, ciudadanonan lo tin percepcion cu e suma aki ta bay ta cla pa tuma riba un cuenta di banco. Minister a desmenti esaki, splicando cu e suma aki ta bay segun calculacionnan di trabou cu tin cu tuma luga. Pues si ta trata di experticio of asistencia huridico y tecnico, e ta pagabel directamente na esun cu ta contribui.

Di e manera aki tambe por pensa cu si tin mester pa kustwacht y demas autoridad keda mas alerta riba frontera, e oranan di overtime aki lo bin na remarca pa ta pagabel cu e suma di 23.8 miyon Euro cu Hulanda a pone na disponibilidad pa ambos isla. “No t’asina cu e suma aki lo nifica cu nos lo haya asistencia bou fondonan specifico. E suma ta calcula tambe bou asistencia tecnico. Por ehempel si nan manda un team di entrenado di IND e personanan ey mester ricibi un salario pa nan trabou. Si nan mester bin Aruba nan tin cu paga pa esey. Pues e suma ey Hulanda a cuantifica.”

Aruba pendiente pa ricibi fondo pa amplia facilidad di detencion
Durante e conferencia ayera mainta minister alabes a confirma cu Corsou a haya notificacion caba cu nan lo bay haya 132.000 Euro pa asina por amplia nan facilidad di detencion. Aruba a haci un aplicacion similar, den mesun rango pa tambe amplia e facilidad cu Aruba tin disponibel pa detencion di migrante ilegal. Esaki ta den cuadro di gobierno su deseo pa bin cu e modelo di Schiphol encuanto peticionnan di asilo, cual ta encera cu gobierno ta mantene su mes skerpi pa contesta peticionnan den un termino di menos cu un luna, wantando e peticionarionan den detencion mientras nan ta warda e contesta.