Dia 10 di september ultimo, a tuma luga den Cas di Sint Maarten na Den Haag un evento organisa pa Minister Plenipotenciario, Jorien Wuite. Tambe tabata presente Minister Plenipotenciario di Corsou Anthony Begina, varios empresario Hulandes y representante di RVO, BZ.
Durante e evento, Wuite a elabora riba e desaroyo positivo tumando luga na Sint Maarten despues di horcan Irma. Alabes a enfatisa e motibo pa organisa ‘Smile Event’ cu ta pa atrae mas empresario Hulandes pa inverti na Sint Maarten. Na final, a invita tur compania presente pa participa na ‘Smile Event’ cu lo tuma luga dia 25-26 di october proximo na Sint Maarten.
Durante e evento, Minister Plenipotenciario di Aruba, Guillfred Besaril tabatin e oportunidad pa intercambia cu e empresarionan Hulandes riba e politica economico di gobierno Wever-Croes. E vision economico di Gobierno ta enfoca riba turismo, economia di conocemento, logistica, sector primario, economia circular y industria creativo/cultural manera arte y musica, diseño grafico. Di e forma aki a mustra cu Gabinete Wever-Croes ta enfoca pa crea mas cupo di trabou pa hisa calidad di bida di esunnan na Aruba.
Besaril a combersa tambe cu presidente di ‘Ondernemend Nederland ONL’, Hans Biesheuvel riba posibilidad pa traha hunto pa logra vision economico di gobierno di Aruba.
Besaril a keda satisfecho cu e evento y a desea Wuite tur clase di exito cu e evento na Sint Maarten dia 25 di october proximo.
Potretnan ta cortesia di Joel Ayuk CANI TV
