Den Haag – Minister Plenipotenciario Guillfred Besaril a haci un bishita di trabao na Futura Lab. Aki e mandatario a reuni cu Varelie Croes cu ta na cabes di e bureau aki cu tin como tarea principal pa duna contenido na e maneho di gobierno riba tereno di innovacion.
Un punto cardinal cu Minister Plenipotenciario Besaril a trece dilante ta introduccion di e-government na Arubahuis. Pa por haci esaki lo mester bin un asina yama “doorlichting” di e organisacion riba tereno di finanzas, operacion y recurso humano. Asina esaki ta cla, minister Besaril lo ta desea pa Futura Lab por analisa e rapport aki pa nos mira con nos ta bai finalisa e proceso aki. E motibo pa e peticion aki ta basa riba e presentacion sumamente interesante cu Varelie Croes a duna recientemente na conseho di minister basa riba nan experencia di nan bishita di trabao na Estonia. Di su banda Minister Besaril a bisa cu e tin bon contacto cu e embahadora di Slovenia, na cual pais tambe nan ta hopi leu cu e proceso di e-government. Segun Minister Plenipotenciario Besaril, Aruba por siña di e paisnan aki.
Tambe a papia di e posibilidad di un portal pa acumula data di Arubanonan cu ta biba na Hulanda. Esaki ta un proceso cu mester bai cuateloso cune basa riba e ley di privacy na Europa. Loke si Minister Plenipotenciario Besaril a bisa di den ehecusion ta e introducion desde aña pasa di un “studentenvolgsysteem” pa asina tin un bon bista kico e studiantenan ta studia y den ki ramo di profesion nan a caba.
Un proyecto cu sigur tin hopi potencial, segun Minister Plenipotenciario Besaril, ta District 297, cu ta un plataforma cu por duna un indicasion di unda nos hendenan ta y kico nan ta haci; tanto pa studiante como profesionalnan. District 297 mester bira un plataforma pa crea posibilidad pa e Arubano cu kier bin traha na su pais of e entrepreneur Arubano cu ta mira chensnan economico na Aruba. Aña pasa District 297 a keda lansa na Hulanda door di Prome Minister Evelyn Wever-Croes na Arubahuis y despues tabata tin algun encuentronan na Hulanda.
Banda di District 297 Minister Plenipotenciario Besaril ta boga pa bin cu un mercado di trabao (banenmarkt) na Hulanda y crea un vacaturebank via di e website di Arubahuis unda e Arubano na Hulanda tin bista di e oportunidadnan di trabao na Aruba e doñonan di trabao por mira e tipo di profesionalnan Arubano na Hulanda cu nan por interesa nan pa bin traha na Aruba.
E potret ta cortesia di Cas di Aruba
