Minister Plenipotenciario, Guillfred Besaril den nomber di Gobierno di Aruba a atende e Internacional Solidarity Conference on the Venezuelan Refugee and Migrant Crisis dialuna dia 28 di october ultimo na Brussels.
E conferencia aki a dura dos dia y ta un iniciativa di Comision Europeo, e comision di Nacionnan Uni pa refugiado UNHCR y e Organisacion Internacional pa Migracion IOM.
Besaril a forma parti di e delegacion di Reino Hulandes, unda tambe tabata presente Minister Plenipotenciario di Corsou, Anthony Begina; Gezaghebber di Boneiro, Edison Rijna; e Representante Permanente di Reino Hulandes na Union Europeo, Robert de Groot; y demas conseheronan di Ministerio di Asuntonan Exterior, Curaçaohuis y Arubahuis.
E conferencia a cuminsa cu discursonan di e Comisario di Union Europeo pa Ayudo Humanitario y Management, Crisis Christos Stylianides y Comisario di Union Europeo pa Cooperacion Internacional y Desaroyo, Neven Mimica. Ambos den na discurso a enfatisa e importancia pa tene e conferencia aki na e momento aki, mirando e magnitud di e crisis cu refugiadonan Venezolano y e impacto cu esaki ta trece pa e paisnan bisiña di Venezuela. Aworaki ya caba tin mas cu 4 miyon Venezolano cu a huy di nan pais y e expectativa ta cu e cantidad aki por crece na 6,5 miyon otro aña. Tambe a bisa cu e proposito di e conferencia ta pa mustra e solidaridad di e comunidad internacional pa cu e refugiadonan Venezolano.
Ex Vice Presidente di Guatemala, Eduardo Stein den su funcion actual como representante special di UNHCR y IOM pa Refugiadonan y Migrantenan Venezolano, a papia riba su tarea principal pa promove e coordinacion regional y tambe pa crea un agenda humanitario pa haya sosten internacional pa e paisnan cu ta tuma refugiadonan Venezolano.
Despues di e discurso di Stein, tabatin dos seccion di discusion. E prome panel a trata e tema di perspectiva di e region: retonan y oportunidad. Akinan tabata tin presentacion di representantenan di Peru, Colombia, Ecuador y Argentina. Specialmente loke ta Peru, Colombia y Ecuador – cu ta conta cu un contingente hopi grandi di refugiadonan Venezolano – a papia di e impacto cu esaki ta trece pa e sector di enseñansa y salubridad publico. Sinembargo e paisnan aki a trece dilanti cu e binimento di refugiadonan Venezolano por tin un impacto positivo pa e paisnan. Peru por ehempel, por soluciona su scarsedad di mediconan cu dokter y specialistanan Venezolano.
E di dos discusion tabatin presentacion di Organisacionnan manera Banco Mundial, Save the Children y Inter-American Bank. Akinan mas bien a papia riba e contribucion di e organisacionnan aki pa e crisis. Esaki por ta cu prestamo pa e paisnan cu a yuda e refugiadonan of tambe iniciativanan di NGO’s y empresanan priva.
Na final di prome dia e conferencia, e Representante di Union Europeo pa Asuntonan di Exterior, Federica Mogherini; High Commisioner di Nacionnan Uni pa Refugiado, Filippo Grandi; y Director General di IOM, Antonia Vitorino a haci e apertura oficial. Nan tambe a enfatisa riba e caracter di e conferencia, e emergencia di e situacion y cu Union Europeo, UNHCR y IOM ta atende e crisis aki como un prioridad hopi halto. Mogherini a bisa cu e magnitud y impacto di e crisis aki no ta demasiado consciente bou di e Comunidad Internacional y cu tur dia miles di hende ta huy for di Venezuela. Na final a keda remarca cu un solucion pa e problema lo mester ta uno politico, unda mester bin un transicion na un sistema politico democratico na Venezuela.
E potretnan ta cortesia di Cas di Aruba
