Shamira Raphaëla a haci un bishita di cortesia riba diaranson 23 di october na Arubahuis, riba invitacion di Minister Plenipotenciario Guillfred Besaril. Shamira recientemente a ricibi un ‘Gouden Kalf’ pa su documental ‘Daddy And The Warlord’. E ‘Gouden Kalf’ ta e premiacion di Hulanda pa cinematografia, compara cu e Oscar na Hollywood.
Den e documental ‘Daddy And The Warlord’, periodista Clarice Gargard – hunto cu director di cine Shamira Raphaëla – a cuminsa un buskeda riba e cara real di Clarice su tata, cu pa añanan a traha pa e regimen cruel di Charles Taylor, ex-Presidente di Liberia, Africa.
Besaril a felicita – den nomber di Gobierno di Aruba, staf y personal di Arubahuis – Shamira cu su premio. “Aruba ta hopi orguyoso di bo. Nos ta desea Shamira hopi exito cu su carera den e mundo cinematografico y cu sigur nos por spera hopi produccion bunita dje den futuro,” Besaril a bisa.
E potret ta cortesia di Cas di Aruba
