Minister Plenipotenciario, sr. Guillfred Besaril, ta sigui explora e posibilidadnan na Hulanda y Europa pa stimula e economia di Aruba p’asina yuda saca nos isla for di e crisis actual di Covid-19. Den cuadro di e tema aki, Minister Besaril tabata tin un combersacion di orientacion cu e conocido economista di Netherlands Foreign Invesment Agency (NFIA), sr. drs. Ron Hogenboom.
Segun un comunicado di gobierno, e meta principal di e encuentro aki tabata pa repasa e areanan cu Gobierno di Aruba a identifica como sectornan prometedor pa Aruba su economia (‘Promising Sectors of Aruba’) pero mas importante kiko ta e condicionnan mas basico cu nos Pais mester tene cuenta cune pa ta realmente exitoso den nos plan di recuperacion.
Trece inversionistanan di exterior na Aruba ta importante. Akinan sr. Hogenboom ta accentua cu tin dos manera pa haci esaki. E prome aspecto ta pa crea e condicionnan necesario pa inversionistanan. Den e cuadro aki, Aruba tin e bentananan grandi den e region Caribense comokiera cu nos sistema legal ta acopla den terminonan general na esun di Hulanda. Esaki ta un punto conoci pa Aruba. Caminda e combersacion tabata realmente interesante ta riba e punto den cual nos sistema legal mester adapta mas rapido riba e cambionan economico premira Post-Covid. Un ehempel ta e uzo di tecnologia den e industria-creativo. E leynan na Aruba mester ta cla pa acomoda e uzo di tecnologia, tanto den e aspecto general como su mal uzo tambe p’asina e inversionista sintie protegi den su inversion. Otro elemento positivo ta cu Aruba a reconoce e implementacion di E-Governance como componente clave den Aruba su desaroyo. Esaki por limita e asina yama “Red Tape” cu ta stroba inversionistanan na momento di kier cuminsa opera na nos isla.
Segun sr. Hogenboom e di dos manera ta si e Pais mes kier stimula su economia pa medio di inversionnan di parti di Gobierno. Esaki no ta algo inusual cu den e teorianan economico ta conoci como “Economia Keynesiana”. Condicion importante pa e teoria aki funciona ta, cu e Pais mester tin placa! Pues un pensamento cu a haya cierto acogida despues di e crisis financiero mundial di 2007-2009 pero cu resultado mixto depende di e Pais cu a implementa esaki y cu pa Aruba na e momento aki sigur no ta factibel mirando e situacion cu Aruba ta pasando aden pa motibo di Covid-19.
Minister Besaril hunto cu sr. Hogenboom a repasa e plan economico di Gobierno y den liña grandi ta deacuerdo cu Aruba ta riba bon caminda asina sr. Hogenboom a comparti. Na final di e combersacion a keda palabra cu lo bai tin un combersacion cu Minister di Asuntonan Economico pa concretisa pasonan pa stimula economia di Aruba.
Ron Hogenboom tin 3 aña ta traha na NFIA y como economista e tin 25 aña di experencia den e mundo bancario y na diferente ministerionan na Hulanda, entre otro Finanzas y Asuntonan Economico. Tambe e tin experencia den exterior, unda ela ocupa funcionnan na embahada di Reino na Berlin, consulado general di Reino na München y na e ministerio di Finanzas di Alemania.
E potret ta cortesia di Cas di Aruba.
