DEN HAAG – Minister Plenipotenciario, Guillfred Besaril a tene un reunion cu Procurador General mr. Alexander van Dam. Tambe presente tabata Nuris Dabian, coordinador di e departamento di Asunto Social na Arubahuis. Meta principal di e combersacion ta pa mira unda Arubahuis por hunga un rol den e Social Crisis Plan pa loke ta toca e aspecto hudicial.
Procurador General Van Dam a bisa bon cla cu loke husticia mester di dje cu hopi urgencia ta profesional forensico pa duna e sosten necesario. Segun Van Dam, esaki ta sumamente importante pa detecta e seriedad di un caso of di un melding. Van Dam ta sigui bisa cu aunke cu husticia tin un rol importante den casonan social, ta e partnernan riba tereno social ta esunnan primordial pa tuma pasonan riba e tereno aki.
Besaril a bisa cu mirando cu Arubahuis tin bon relacion cu diferente gemeentenan y instancianan social na Hulanda, e ta kere cu Arubahuis por hunga un rol importante pa e partnernan na Aruba. Di e manera aki, e mandatario a bisa e Procurador General cu pa cualkier intermediacion e por acerca Arubahuis.
Despues di e combersacion Procurador General a invita Besaril pa un presentacion di e Veiligheidshuis Aruba. Akinan e process manager di Veiligheidshuis Aruba, drs. Bernice Schulte, a duna splicacion di e kico e Veiligheidshuis ta haci y ken ta e partnernan den e proyecto aki. Pa duna un idea mas cla di Veiligheidshuis Aruba, Schulte a presenta un video tocante e proyecto. E video na un manera hopi simpel ta enfoca riba problemanan social. Proximamente e video aki lo keda presenta na e canalnan di television pa informa e comunidad.
Besaril a gradici Procurador General y su staf pa e reunion y tambe e compromiso haci pa traha hunto pa enfrenta e retonan social di nos comunidad.
E potretnan ta cortesia di Cas di Aruba.
