Minister Plenipotenciario Guillfred Besaril a reuni ayera diamars 28 di september cu personal di Arubahuis, despues cu Conseho di Minister di Gabinete Wever-Croes II a ratifica e nombramento di 20 di november 2017, den cual Guillfred Besaril ta mantene e funcion di Minister Plenipotenciario di Aruba na Hulanda.
Den su discurso na e personal, Besaril a bisa di ta sumamente orguyoso y honra di a ricibi e confiansa di Gabinete Wever-Croes II di ta un biaha mas aki na Hulanda pa asina sigui desplega e trabao pa cu e diaspora di e Arubiano na Hulanda, cu ta mas cu 25 mil hende y pa haci e trabao cu mester wordo haci den Europa. ‘Nos no mester lubida cu awor aki nos ta den un pleno “rebuilding” di nos pais. E aña aki nos mester busca y zorg pa mantene tur relacion pa nos bay mira kico ta e oportunidadnan pa pais Aruba,’ segun Besaril.
E mandatario a sigi bisa cu e hecho cu a nombra su persona den e funcion di Minister Plenipotenciario ta basa riba continuacion. Besaril: ‘Nos ta den un proceso awor aki cu Hulanda, pa loke ta e landspakketnan, pa loke ta COHO y e dinamica cu lo bay bin a raiz di COHO pa e proximo cinco a seis aña. Mirando cu mi tabata na pia di e proceso aki na momento cu el a cuminsa, pues e ora ey Aruba lo kier un continuacion pa e proximo añanan, pasobra loke ta mi persona y e team di Arubahuis na e momento aki nos conoce e dinamica; nos ta den dje caba. P’esey teniendo cuenta con delicado y importante e ta pa futuro di nos pais, continuacion ta algo esencial. Pa es motibo a scoge pa mi a bini back den e funcion aki,’ asina Minister Plenipotenciario Guillfred Besaril a bisa.
E potret ta cortesia di Cas di Aruba.
