Den su encuentro cu personal di Arubahuis, Minister Plenipotenciario Guillfred Besaril a elabora riba e proceso di reorganisacion di Arubahuis y tambe riba renobacion di e edificio na R.J. Schimmelpennincklaan 1.

Besaril a bisa cu na momento cu e tabata sigur cu e lo keda renombra den e funcion di Minister Plenipotenciario, e prome combersacion cu e tabata tin ta cu Departamento di Recurso Humano (DHR) pa asina finalisa e proceso cu e cuminsa na 2020 di reorganisacion. ‘Nos mester a bay mira un rato si e documentonan cu nos a aproba den ministerraad na februari 2020 ta actual ainda. Nos a conclui hunto cu directora di DHR cu 80 pa 90 porciento di e documentonan ta actual ainda. Tin cierto funcionnan cu nos mester bay revisa pa motibo di e dinamica nobo cu COHO a trece cune; exigencianan nobo pa cu personal cu COHO ta trece cune y e maneho cu Hulanda lo ta desea pa nos tin, pa motibo cu Hulanda kier yuda nos bira mas eficiente. E no ta un exigencia pasobra nan kier manda riba nos – manera cu mi a lesa den diferente medionan di comunicacion – nan ta exigencianan caminda nan ta bisa si bo hacie di e forma aki, bo ta bay ta mas eficiente. Dicon no, si e por di un otro manera caminda nos por ta mas eficiente, no solamente cu cen, pero tambe cu conocemento. E speransa ta pa 2022 nos formalisa esaki. Ya nos a cuminsa encamina e proceso caba; nos a identifica caba con nos ta bay guia e proceso aki di introduccion di e organisacion nobo. Pues pa loke ta Arubahuis esey ta bay ta e prome stap,’ asina Besaril a bisa.

E mandatario a comparti cu e personal e trayecto di renobacion di Arubahuis. Sr. Besaril a cuminsa na bisa cu hunto cu Prome Minister cu tambe tin e cartera di infrastructura ta bay mira si no ta na 2022 of na 2023 si tin e fondonan necesario pa cu e renobacion tan necesario di Arubahuis. Minister Besaril: ‘Renobacion di Arubahuis ta bay solamente si tin e manera, pasobra pueblo di Aruba ta bay na prome lugar. Nos a hacie na 2020 na momento di e pandemia, na momento cu nos a realisa nos mes cu e suma stipula pa renoba e edificio, mihor us’e pa asina aki nos sali conhuntamente for di e situacion penoso cu e pandemia aki a hinca nos den dje. Pues semper den e combersacionnan cu mi a hiba, e renobacion necesario di Arubahuis, ta bay na prome lugar si tin e espacio financiero necesario, sin cu e ta afecta pueblo, pa asina aki nos por haci e trabao. Con cu bay bin, aki na Hulanda e edificio ta cara di Aruba. Pues si bo cara ta na deuk, anto bo ta mustra malo,’ segun e declaracion di Minister Besaril.

E minister a remarca cu e ta spera di mira sikiera e comienso di e proceso eynan prome cu e baha di su di dos periodo como Minister Plenipotenciario. Banda di e dos aspectonan aki sr. Besaril a pone atencion riba un reto di igual importancia cu ta continuacion di e proceso cu a cuminsa di mehora tur loke ta e guia di e hobennan Arubiano cu ta bin Hulanda pa estudio. ‘Riba e tereno aki tin retonan grandisimo. E cuestion di camber of otro tipo di alohamento pa studiante ta keda un “challenge”. No solamente pa e hobennan cu ta bin di Aruba, pero tambe pa e hoben Hulandes mes cu ta bisa cu e unico manera pa mi studia loke mi kier studia ta pa bay biba na un otro lugar cu no ta unda mi mayornan ta biba. Por ehempel e hoben ta biba na Maastricht, pero ta sigi un estudio tecnico na Eindhoven. Pasobra cu e no por haya un camber, e lo mester biaha tur dia entre Maastricht y Eindhoven. Tin combersacionnan cu nos mester bay hiba cu e gemeentenan grandi unda den mayoria nos studiante ta bin studia, manera Amsterdam, Rotterdam, Den Haag y Utrecht pa conhuntamente nos mira pa purba na yega na solucion hunto cu e gemeentenan pa nos hobennan. E no ta facil, pasobra e decision no uno di Gobierno di Aruba, pero e ta un decision di Gobierno di Hulanda; e gemeentenan. Nos ta bay purba di haci e maximo esfuersonan pa nan reconoce cu nos hobennan ta hobennan di Reino, nan ta bin di hopi leu pa busca oportunidadnan nobo. Y si nos ta papia di mehora Reino, di mehora calidad di bida den Reino, anto e ta cuminsa na estudio,’ segun Minister Plenipotenciario Guillfred Besaril.

Por ultimo e mandatario a bisa di ta sigur di por conta cu e respaldo di e personal pa e retonan cu Arubahuis lo enfrenta e añanan cu ta bin, mescos cu tabata e caso den e ultimo cuater añanan.

E potret ta cortesia di Cas di Aruba