E conocido periodista di farandula Arubano, “Jan Poets”,tin 48 ora pa rectifica riba su paginanan di Facebook! Tabata riba diabierna 3 di juli 2020, e mesun dia cu comunidad Arubano a manifesta di manera masal contra e fenomeno “Pedofilia” na Aruba, cu e periodista “Jan Poets” a dicidi na lansa un serie di acusacionnan den direccion di e actual Minister Plenipotenciario di Aruba, Sr. Guillfred Besaril.
Corte den Prome Instancia a dicta na fabor di Minister Besaril y den caso cu e conocido “Jan Poets” no cumpli cu e sentencia aki, e lo hay’e ta paga un suma di 5 mil Florin pa dia cu e no rectifica, te cu un maximo di 100 mil Florin.
Minister Besaril pa medio di e comunicado di prensa aki kier a laga sa di ta sumamente satisfecho cu e sentencia di hues den e caso contra e conocido “Jan Poets”. hues Sr. mr. Keltjens den su veredicto di 19 di augustus 2020 ta duna Minister Besaril rason riba tur punto cu Sr. Besaril a trece pa dilanti durante e tratamento di e caso. E hues a bisa cu acusa un persona di un delito manera pedofilia sin prueba alguno of sin un manera na substancia e acusacion aki,ta un hecho hopi serio y lamentabel cu ademas di ta serio e ta causa dolor innecesario na tanto e persona cu wordo acusa inhustamente como su famia. Ta e conocido “Jan Poets”mes den sala di corte a declara cu e no tin prueba pa loke el a declara por medio di un video riba su plataforma social (Facebook).
Dado momento “Jan Poets” kier defende su mes cu entre otro e argumento, cu na momento cu e la realisa cu e tabata robes, e la baha e video basta lihe for di riba su Facebook, por lo tanto no ta hopi ta esnan cu a haya oportunidad na mira e contenido di esaki. E argumento aki no a convence hues Keltjens. Loke hues a tene debido cuenta cune den su veredicto, ta e momento cu “Jan Poets” a scoge pa lansa su acusacionnan, esta riba un dia cu tabata tin un demostracion grandi na Aruba riba e situacion di abuso sexual bou di muchanan di Aruba. Cu e consecuencia cu e acusacionnan aki por wordo acepta pa e publico como algo cu ta berdad.
Tur esaki a conduci hues na yega n’e conclusion cu e derecho di Sr. Besaril, riba proteccion di su honor y bon nomber, ta pisa mas fuerte cu “Jan Poets” su libertad di expresion y libertad di prensa.
Por ultimo Minister Besaril a declara cu e veredicto aki ta sumamente importante en bista di e tendencia actual cu tin riba “Social Media” na Aruba. Pueblo tin e libertad di expresion y periodistanan tin nan libertad di prensa. Ambos derecho ta wordo protegi pa nos constitucion, pero na momento cu bo no tin prueba alguno di loke bo kier trece padilanti, e informacion ta bira un redo y esaki por causa daño grandi na e bon nomber di bo conciudadano. Muy en special den un comunidad asina chikito manera esun di nos dushi Isla.
Potret cortesia di Cas di Aruba, Den Haag.
