“Nos por conclui cu e preocupacion grandi cu nan a manifesta den e rapport di e prome kwartaal ta menos y hopi biaha bo ta wak cu esaki ta pasa pa motibo di comunicacion y falta di informacion.”

Esaki ta e conclusion di minister minister di Finansa, Angel Bermudez despues e reunion diabierna ultimo cu e colegio di supervision Caft. E informacion aki ta for di un relato manda pa gobierno. Durante e reunionnan a papia entre otro riba e cuenta anual 2016 unda cu sr. Bermudez a informa cu pronto, tanto nos Contraloria General y tambe e Colegio di Supervision, ta ricibi e concepto cu ta casi cla pa ambos institucion por duna nan comentarionan.

Na mes momento a papia riba presupuesto 2017 y a pesar cu Caft a expresa cierto preocupacion a base di e cifranan di e prome kwartaal di e aña aki, Minister Bermudez a indica cu su preocupacion no ta grandi. Esaki pa motibo cu tin cierto punto cu mester tene na cuenta cun’e, manera e VAS di winstbelasting cu ta genera e entrada di e aña aki na Mei y Juni pues e ta keda raporta den e di dos kwartaal y consecuentemente ta wak un suma hopi mas grandi pa loke ta entrada di impuesto. Den entradanan di Pais Aruba ta conoci cu tin diferente momento cu ta aumenta di manera significante pa motibo cu legalmente e por wordo cobra, por ehempel, e VAS winstbelasting, pero tambe motorijtuigbelasting y cu inkomsten belasting tambe sa pasa. “Ora di haci e calculacionnan bo mester tene cuenta cu e tipo di aspectonan aki enbes di tuma un resultado y simplemente multiplica pa 4 pa bo haya e resultado completo di henter aña. No ta asina e wega ta bay”, segun e mandatario.

Presupuesto 2018 na tempo
“Esaki kiermen cu e aña aki atrobe, no solamente nos lo habri aña cu un presupuesto di 2018 pero cu tambe e cuenta anual 2016 lo wordo entrega na tempo. Mescos cu e presupuesto 2018”, asina minister Bermudez ta sigura.Otro punto di discusion tabata normanan nobo cu mester establece pa presupuesto despues di aña 2018  ya cu, den e ley di supervision di Laft, e ultimo normanan ta caduca y lo mester stipula norma nobo pa e 5 aña cu ta bin.

Segun e mandatario tin un comision actual cu ta deliberando kico e normanan lo mester ta si tuma na cuenta nos economia, nos capacidad y nos perspectivanan regional. Minister Bermudez: “Mi ta spera cu pronto mi por trece un proposicion pa adapta e ley di Laft cu e normanan di e añanan venidero.”Finalmente, tambe a actualisa e colegio riba e desaroyonan di e refineria, como tambe, e protocolnan cu a keda firma siman pasa pa riba termino corto e rehabilitacion por tuma luga. Sinembargo riba e puntonan aki e relato manda pa gobierno no ta bay den detaye kico e minister y Caft a conclui den e reunion.