E grupo aki di 20 miembro nobo di duana ta forma parti di e klas 2 di aña 2017. Nan a wordo scogi pa un proceso cu a dura seis luna. E tarea aki a wordo realisa pa medio di un comision mixto cu minister Angel Bermudez a institui, unda a participa entre otro departamento di Recurso Humano (DRH), pero te hasta sindicato di duanero (SADA) tambe.
Minister Bermudez a laga sa cu pa evita influencia politico den e seleccion di personal nobo, el a bin fei inicio cu e comision mixto aki. E meta di e comision aki ta pa nan miembronan a base di normanan obhetivo, entre nan edad, largura, peso, pero tambe condicion fisico por selecta nan. Pero tambe un serie di exigencia mas entre nan test mental, test di Hulandes y conocemento pa e comision por selecta fuera di mi influencia den todo caso, e mandatario a declara.
Durante e presentacion di e grupo nobo di miembronan di e cuerpo di Duana, e mandatario a pidi pa cada un di nan presenta nan mes. Segun sr. Bermudez den e grupo aki no tin a lo menos niun famia. Tampoco niun cu e por reconoce personalmente. “Mi ta contento cu den un manera obhetivo nos a sa di selecciona e grupo aki”, el a bisa .
E ta haya cu e 20 miembronan nobo di duana ta un grupo elite y privilegia cu a mustra nan capacidad y talento den e prome fase di seleccion aki. Pero awor nan lo sigui cu otro fase di estudio riba e base legal di nan trabou y tambe training pa seis luna, unda nan lo mester haci diferente examen crucial. Si nan ta slaag nan por sigui y drenta den e cuerpo di Duana como Hulp Kommies. Pero si bo no ta slaag bo lo sigui bo carera den otro caminda pafo di aduana. Minister Bermudez tin hopi speransa cu tur e hobennan aki lo bay logra inicia nan carera den cuerpo di aduana.
