Dia 9 di augustus ultimo conseho di minister a firma un carta di kaderspersoneel, cual segun Minister di Finansa Angel Bermudez, ta un maneho cu ta existi desde aña 2015 y cu a wordo implementa cu Departamento di Recurso Humano.
Segun e minister a informa, actualmente tin un stop di personal mescos cu diferente instituto, cual CFT a sostene den pasado, sinembargo debi na e cantidad significante di peticion pa promocion of cambio di contract den e ultimo simannan, el a considera esaki e momento oportuno pa corda tur hefe di departamento di e maneho aki.
E mandatario a sigui splica cu ora ta trata di kaderpersoneel, pues profesionalnan cu diploma di HBO of WO, nan por bin na remarca pa wordo nombra como un tijdelijkambtenaar. Pero e profesional mester cumpli cu algun stipulacion, entre otro nan mester ta funcionando positivamente na trabou, mester cumpli cu keuring di dokter y carta di bon conducta. Cual ta loke ley di LMA ta stipula y ta conta pa hendenan den servicio den un funcion existente caba.
“E areglo aki no ta conta pa coordinadornan di ministernan, pues ora tin un cambio di Gabinete e coordinadornan tambe ta bay. Den nan contract ta stipula cu e contract legalmente tambe ta caba ora e termino di e gabinete yega na su final”, asina e mandatario encarga cu finanza publico a indica.
Tambe e minister a menciona cu pa controla y reduci e volumen di e aparato gubernamental, tin entro otro un VUT cual ta habri e luna aki. Tur departamento di gobierno a wordo corda por medio di e carta di kaderpersoneel, cu pa fortifica e calidad di aparato gubernamental, solamente por tuma esnan cu tin un preparacion avansa y cu ta cumpli cu e condicionnan stipula den servicio.
Minister Bermudez ta enfatisa cu pa evita cu aspectonan politico ta cay den wega, principalmente den e temporada aki, a manda un recordatorio na tur hefe di departamento riba e condicionnan pa nombra of propone un persona den un kaderfunctie como un tijdelijkambtenaar.
“E contenido di e carta ta simplemente un formalisacion di lo cual pa e ultimo 2 aña ta andando caba. Si bo lesa e carta bon, e ta un carta cu ta pa clarifica, pues e no ta nada nobo”, asina Minister Bermudez a conclui.
