Den su conferencia di despedida minister di Financia, Angel Bermudez a laga sa cu tres aña pasa el a wordo yama pa forma parti di gabinete Mike Eman II, pero e situacion no tabata uno di canta macamba.
Den su forma directo di papia, e mandatario demisionario a indica cu e no a wordo invita pa un fiesta, ora cu el a asumi e responsabilidad di bira minister, ya cu Hulanda a bin cu un KB y ley di LAFT (Landsverordening Aruba financieel toezicht) y instalacion di colegio di supervision CAFT, a keda introduci.
El a laga sa cu durante e añanan aki como mandatario responsabel di e maneho di financia publico, e mester a haci un poco di maniobra acrobatico financiero, manteniendo e forsa di compra y evitando stagnacion riba desaroyo di nos pais. Aunke e ta reconoce cu e debe ta halto ainda, pero nan a logra para e debe nacional y reduci e deficit conforme e ley di LAFT bou supervision di CAFT.
Pues e ta haya cu durante e añanan aki nan a logra para e desaroyo negativo. Ademas mirando e desaroyo positivo di nos turismo y apertura di e refineria pa 2018, e ta premira cu e panorama lo ta hopi prometedor. Sr. Bermudez a indica cu si e gobierno nobo lo sigui riba e ruta aki di domina e gastonan y optimalisa entrada di gobierno, lo tin un surplus. E surplus aki lo contribui pa reduci e debe nacional y defacto paga menos riba interes, y fia menos placa di afo.
Igualmente ainda ta pendiente e ultimo rapport di financia. E no a aventura su mes pa bisa cu e lo ta uno positivo. Ainda departamento di financia ta den e trabou di compila tur e cifranan di tur departamentonan concerni pa asina nan por haya un concepto pa repasa y wak si tin cos straño aden. E ora ey oficialmente e ta wordo publica prome cu mita di november, ya cu esaki ta e periodo stipula pa e ley LAFT.
Presupuesto supletorio
Mirando cu ainda un gobierno nobo no a keda instala oficialmente, y tanten e gobierno actual ta sigui demisionario, sr. Bermudez ta wak cu e posibilidad t’ey pa nan bin cla cu e presupuesto supletorio. Awe ta drenta un concepto di e presupuesto supletorio, cu nan lo trata den seno di conseho di minister. Aunke e ta bisa cu e presupuesto supletorio mester wordo aproba prome cu 31 di december. Esaki si acaso cu ainda un gobierno no ta wordo instala pa e fecha ey, naturalmente e supletorio mester t’ey. “Ademas e mester wordo aproba pa e minister di financia demisionario of esun nobo”, segun sr. Bermudez.
El a agrega cu e gobierno demisionario mester atende cu asuntonan cu ta coriente, y un asunto regular ta e presupuesto supletorio a base di e ley LAFT. “Sino mi por bisa: ayo y bon nochi. Pero e ley LAFT ta pone cu bo tin prepara esey den e termino cu e ley ta stipula”, el a bisa. Gobierno demisionario tin cu sigui traha pa den todo caso trece e presupuesto supletorio y tambe e proyecto di ley di e presupuesto 2018, y e rapport di e trimester di financia publico.
