7jul, NW, benny bubali (1).jpg

Recientemente a inicia den corte un otro caso contra di gobierno. E biaha aki ta trata di Bubali Plas, unda cu companianan inversionista a demanda gobierno pa e situacion cu tereno a wordo duna y tin mas na caminda. Minister di Infrastructura, Sr. Benny Sevinger, a bisa cu gobierno no a cambia su posicion pa cu e situacion di Bubali Plas. E mandatario ta kere pa motibo di e ROP, un gobierno anterior no por mara un gobierno pa futuro. E mandatario a admiti di no a haci cambio den e ROP y hues a mustra riba esey, cu mester a haci cambio pa por duna e terenonan mientras cu tin hende no ta di acuerdo pa duna e terenonan aki pasobra kier mantene e area berde.

 

Gobierno a desaroya henter cambionan cu nan ta mira cu mester bin den e ROP. “Awo nos ta canando esaki pa varios aña caba. Mi ta lamenta cu esey y ‘mea culpa’ cu esaki no a sosode lihe y awo hues a duna esey un punto,” e mandatario a admiti. Bubali Plas ta un plas cu den ROP ta wordo poni di ta un area cu ta gara awa di yobida na momento cu awa yobe. Esaki ta conta tambe pa tur e otro saliñanan cu ta, Saliña di Malmok, patras di The Mill, Bakval y tin otro saliñanan rond di Aruba cu ta wordo poni pa gara awa na momento di yobida. Ora cu a traha e planta di purificacion y trata awa di riool di parti Oranjestad na Bubali Plas, esaki tabata bay lama. Prome cu e bay lama, a dicidi di manda esaki pa Bubali Plas.

 

Ambiente nobo pa naturalesa

Esaki a crea un ambiente nobo pa naturalesa, awa cu ta wordo manda pa Bubali Plas a trece vegetacion, vegetacion a trece pisca, pisca a trece parha. Esey a pone cu e area a bira berde y tur hende ta contento di dje, tur hende por bay mira e parhanan, segun e mandatario. “Esey no ta kita cu bo tin cu para otro desaroyonan, pasobra esey ta tumando luga,” el a indica. “Si bo mira e area cu nos kier proteha y ta bay proteha, awo den conforme peticion di parlamento, nos bay proteha e area aki. E area aki ta mas grandi cu tur e area di hotel, cu ta trece e desaroyo y pan na mesa di nos tur akinan, cu ta e sector turistico.”

 

Trata desaroyo rond Bubali Plas

Ora cu gobierno a trata e desaroyo cu tin cu bin rond di Bubali Plas, teniendo cuenta cu e economia, teniendo cuenta cu e expansion di e propio planta di DOW cu tin cu bay sigui duna bida na Bubali Plas. Ta lamentabel cu si no manda awa den Bubali Plas, esaki lo ta un saliña manera esun di Malmok cu no tin ningun vegetacion y ni parha. E area aki no ta uno natural y normal, pero e ta un area cu awa ta wordo manda eynan pa mantene esaki cu bida. “Ta manda 5 mil metro cubico pa dia den Bubali Plas.”

 

Bira area berde

Rond di e area aki tin e corridor turistico, di cual gobierno ta kere cu mester sigui su caminda. Pero lamentablemente den e plannan anterior, gobierno anterior, parti di dje na ultimo momento a dicidi cu esaki lo bira un area berde (groen gebied), segun e mandatario. E gobierno actual no ta di acuerdo cu esaki. “Nos opinion ta cu ROP ta un Ruimtelijk Ontwikkelings Plan. E ta un plan di un vision di gobierno. E no por ta asina, den mi opinion, cu un gobierno anterior por mara un gobierno den futuro. Si esey ta asina, ban bisa ami baha na e momentonan aki y bin cu un ROP nobo, y si ami dicidi cu tur Aruba ta bira un area berde y naturalesa, bo por puntra bo mes kico gobierno anterior por haci,” segun e mandatario. Nunca por ta asina cu un ROP cu ta un plan di maneho, cu ta un maneho di gobierno, por stroba un gobierno nobo, segun e mandatario.