Gobierno a haya su mes den corte pa motibo cu nan a wordo demanda pa no paga e compania Bouldin & Lawson cu a traha riba e proyecto di reciclahe na Parkietenbos. Hues a dicta na fabor di e compania y Gobierno mester paga e suma cu falta. Minister di Infrastructura, Sr. Benny Sevinger, a nenga di paga e cobransa di e compania, pero hues a mustra cu mester paga e suma di 3 miyon. E proyecto aki no a trece solucion pa dump y a costa Aruba 28 miyon, cu ta un suma cu a wordo tira afo.
“Na momento cu nos a drenta Gobierno, e prome recibo cu mi a haya segun mi tabata tin dos dia den Gobierno, tabata pa paga Bouldin & Lawson 3 miyon,” Minister Benny Sevinger a indica. “Mi a bisa, absolutamente ami no tabata e Minister y mi ta kere den continuacion di gobierno si, pero un ta por ta cu ami ta un di nan cu a haci estudio pe proyecto durante oposicion y tabata contra. No paso tabata contra, pero pasobra no tabata tin solucion pa e proyecto di dump.”
No tin solucion pa dump
Te cu e fecha di awe e solucion ey no t’ey. Expertonan a duna Gobierno rason ‘a rais’ di rapportnan cu a wordo traha riba e proyecto aki. “No por ta asina cu e prome pago mester wordo haci, ami ta esun cu tin cu firma esaki na e momento cu mi a drenta den Gobierno,” e mandatario a sigui indica. E ta corda cu e no a firma pa paga e suma di 3 miyon y esey a pone cu e compania a bay corte. Awo un veredicto a wordo duna. “Hues a bisa, Minister bo ta mara na man y pia na momento cu bo a drenta Gobierno,” el a indica. Gobierno anterior a aproba caba e pago di e suma menciona, y awo Minister Sevinger mester haci esey.
Placa t’ey na FDA
Gobierno a manda tur cos pa FDA, pasobra e placa ta na FDA, segun e mandatario. Na FDA e cosnan mester cana su caminda. Minister Sevinger ta kere cu cosnan no a cana lihe, manera esunnan cu kier cobra a premira. P’esey nan a bay un biaha mas, unda cu hues a bolbe bisa pa paga e suma menciona. “Mi no tin duda cu esaki lo wordo paga tambe.”
Gasta 28 mil den proyecto
Realidad ta cu e gobierno anterior a gasta 28 miyon den un proyecto di Bouldin & Lawson, cu te awe pa e Minister esaki no ta sirbi. Si esaki tabata un solucion, awe lo tin e tipo di plantanan aki rond mundo. E tipo di problemanan aki ta wordo haya rond mundo. “Ta un planta tin na mundo, cu ta esun di Aruba y absolutamente no ta funciona,” el a sigui bisa. A costa 6 miyon na e proyecto di simplemente laba e sushi y pone bek na dump. E proyecto aki a wordo yama “Composed” y no tabata funciona. No por a haci nada cun’e.
E gobierno anterior a bisa cu nan lo a bay cera e buraconan cu tin coba rond di Aruba, pero esaki por a wordo haci pasobra estudionan ta mustra cu e sushinan aki ta contamina. No tabata tin solucion pa kita e contaminacion aki den e proceso di Bouldin & Lawson, consecuentemente e sushi tabata cay y bay bek riba dump. Tur esaki tabata costa Aruba 6 miyon pa aña y 28 miyon a wordo tira afo.
