Ainda ta trahando riba e mocion di Andre Bosman pa specifica responsabilidad Reino Hulandes.

Gobierno di Reino a cumpli cu un total di nuebe mocion presenta na Tweede Kamer, particularmente riba topiconan relaciona cu islanan BES, pero tambe Corsou y Boneiro. Di otro banda, tin cinco mocion pendiente ainda. Esaki ta describi na un forma hopi cla den e Presupuesto pa Islanan BES y Relacionnan di Reino, cu a keda presenta Diamars na Parlamento Hulandes.

Mocionnan cumpli

E mocion di miembronan Nevin Özütok di Groenlinks y Antje Diertens di D66, unda a pidi Gobierno pa den bon cooperacion interno cu Caribe Hulandes, busca na e medidanan basa na miho practicanan, pa mehora e maneho financiero, busca un plan di accion y informa Parlamento di e plan aki. Gobierno a informa cu a cumpli cu e mocion aki.

E mocion di Chris van Dam di fraccion di CDA tabata pa pidi Gobierno, pa drenta den dialogo cu Gobierno di St. Maarten riba un separacion di maneho y autoridad den mantencion di estado di derecho, pa asina por mira con Hulanda por hunga un papel mas fuerte den e proceso di control, pa un periodo di cinco aña.

Den nan mocion Ronald van Raak di SP y Andre Bosman di VVD ta puntra Gobierno di Hulanda pa bin mesora cu continuacion di e TBO, cu ta e Tijdsbestedingsonderzoek (trabao productivo sin pago) y pa informa Tweede Kamer di esaki.

Miembro di Tweede Kamer van Dam tambe a pidi Gobierno pa e den peticion pa sosten di likides di St. Maarten, pa pone e capacidad di detencion como condicion prome cu duna e siguiente sosten financiero.

Miembro di fraccion di Groenlinks Özütok a entrega un mocion pa pidi Gobierno, y comisario di Gobierno pa den deliberacion cu e conseho insular di St. Eustatius delinea un kalender pa e bolbe na e relacion administrativo regular entre Gobierno Hulandes y St. Eustatius. Otro mocion di Van Dam di CDA tabata pa pidi Gobierno di Hulanda pa busca y nombra e asina yama ‘kwartiermaker’ pa griffier di conseho insular, pendiente e nombracion definitivo di un griffier. Esaki tambe pa St. Eustatius. Su colega di Tweede Kamer Diertens a pidi pa Gobierno Hulandes duna sosten di forma urgente pa asina por regla cu tur cas na e isla por tin acceso na awa.

Chris van Dam a manda otro mocion unda e ta pidi Gobierno di Reino pa riba costo di pais St. Maarten, tuma e responsabilidad completo, pa un periodo di cinco aña, pa asina por ehecuta maneho riba e prison na St. Maarten.

Antje Diertens a dirigi otro mocion, pa pidi Gobierno pa investiga cua ta e posibilidadnan ta pa fortifica e sosten di conseho legal na Corsou, tanto riba nivel di capacidad como nivel di conocemento y pa raporta esaki den tratamento di Presupuesto den Tweede Kamer.

Gobierno di Hulanda y di Reino a cumpli cu e mocionnan aki.

Mocionnan cu no ta cumpli, ainda

Tin un serie di mocion cu ainda no a cumpli cu nan y e Minister Demisionario pa Asuntonan Interior y Relacionnan di Reino a inclui nan tambe den su presupuesto. Ta trata aki di e mocion di van Raak y Bosman, pa urgi Gobierno pa hunto cu St. Eustatius y Merca haci e preparacionnan necesario pa conmemora e fecha historico di November 16 na 2026. St. Eustatius tabata e prome pais na mundo pa rindi honor na e bandera Mericano nobo na 1776. E dos Parlamentarionan Hulandes a propone pa e celebracion di 250 aña di e saludo militar aki ta atendi pa hefenan di estado di Merca y di Reino Hulandes na e isla.

Miembro di Eerste Kamer pa Groenlinks Paul Rösenmöller a expresa su urgencia pa e Gabinete Hulandes nobo, cu ainda mester keda forma, duna hopi prioridad na relacionnan den Reino, pa medio di intensiva e esfuerso di Hulanda pa asina mehora e relacionnan concretamente y na forma duradero.

E mocion di su coleganan di Eerste Kamer, Don Ceder di ChristenUnie y Attje Kuiken di PvdA kier pa Gobierno di Hulanda actua segun resultadonan real cu mester ta determinante pa bay na e siguiente fase di restaura provisionnan na St. Eustatius. Ambos a pidi Gobierno pa e capacidad necesario, ayudo y preparacion pa facilita e proceso mas lihe posibel. Ceder hunto cu su colega Joop van den Berg di PvdA tambe a pidi Gobierno pa bin cu proposicion pa un papel di coordinacion mas fuerte pa e Minister encarga cu Relacionnan di Reino pa investiga con e pago di asistencia liber den e fondo di islanan BES, por bin den relacion cu e desaroyonan demografico y pa hinca gastonan incidental cu ta pa mas aña den un cuadro di contribucion structural.

Mocion riba responsabilidad Reino Hulandes

Finalmente mester trata ainda e mocion di Andre Bosman, cu a pidi Gobierno pa prome cu un di October 2020 bin cu un proposicion pa relacionnan cla y factibel den Reino y determina e responsabilidadnan di cada pais den e constelacion di Reino Hulandes.

E mocion aki ta bisa specificamente cu teniendo na cuenta cu e Statuut di Reino Hulandes ta data di 1954, cu Reino Hulandes ya no ta cay bao articulo 73 di e Carta di Nacionnan Uni; y cu considerando cu e responsabilidadnan di Corsou, St. Maarten, Hulanda y Aruba no ta hopi cla; considerando cu lo forma un grupo di trabao conhunto pa pone e responsabilidadnan aki cla riba papel; ta di opinion cu ta necesario pa e relacionnan y responsabilidadnan di e paisnan y Hulanda ta cla y factibel, ta pidi Gobierno pa a bin cu e proposicion prome cu October 2020. Esaki no ta sosode ainda.

Segun Minister Demisionario pa Asuntonan Interior y Relacionnan den Reino e mocion aki ainda ta keda den tratamento. Gobierno di Hulanda ta considera ehecucion di e mocion como prematuro. A informa pa medio di carta cu ya caba a cuminza cu peticion similar di Ronald van Raak. Y tanten cu e proceso ta canando su caminda, no ta oportuno pa Hulanda di su banda, duna su vision riba con e reparticion di responsabilidadnan mester ta den Reino Hulandes.