Minister Arthur Dowers: Trabaonan di mantencion ta tumando luga den KIA

Trabaonan di mantencion ta tumando luga den KIA pa loke ta e areanan cu a keda afecta door di e candela cu a tuma luga den e ultimo accion di presonan den e instituto. Segun Minister Dowers, a cuminsa cu e fase preparatorio caminda cu ta saca tur loke a daña como consecuencia di e candela y ta spera cu dentro di algun siman por mira sinembargo un remodelacion di e departamento aki. E candela tabata tin efecto riba e sistema di alarma, e sistema di coriente caminda cu tin cu haci  inversionnan mas grandi cu lo tabata tin cu haci si simplemente lo a renoba. E trabaonan a cuminsa y ta dunando indicacion cu dentro di algun siman por haci uzo bek na e departamento aki, pa trece alivio pa e trahado y tambe pa e preso tambe. Lo bay tin reglanan nobo pa atende cu asunto di candela. Segun cu ta caba un fase, lo bay bin cu e rekisitonan nobo pa loke ta e prizon.

Awor aki tur hende cu a wordo movi, ta na warda di polis. Ta berdad asina ey cu ta mas comodo den un prizon, pasobra tin mas luga asina , asina. Tin caminda cu por “lucht” mas trankil. Segun e minister tin mas actividad den prizon compara cu warda di polis. Esnan cu a contribui cu e kimamento di e luga, ta sinti e consecuencia di esaki. Sinembargo no por tene un hende hopi largo den warda di polis, pasobra e condicionnan no ta esun di mas adecuado y por ta en puña cu reglanan di CPT tambe.

Condicion  malisimo

E luga su condicion ta berdad malo. Un di e cosnan importante ta cu tabata tin personanan trahando riba algun idea, un remodelacion mas grandi di prizon y e parti nobo di prizon. Pa falta di fondo tur esey a pasa. Ta spera cu pasamento di ley aki por haya tiki rosea pa por paga pa un parti di loke a wordo haci caba y duna nan e posibilidad pa por presenta algun plan cu por bay uza den e remodelacion di prizon pa
futuro. Hopi cos ta depende riba e parti financiero. Husticia a coopera cu tur ministerio y a spaar hunto cu tur hende. Sinembargo a yega e limite cu no por haci’e mas y ta contento tambe cu cooperacion pa yega na algun fondo adicional, pero cu no ta fondo di husticia of gobierno regular. Ta fondonan cu ta bin di actividadnan
criminal. Sinembargo parti di e fondonan regular tambe tin cu bay atende cun’e.

Minister Dowers a papia cu diferente experto riba prizon na Hulanda y ningun di e expertonan a bisa cu tin cu hala e prizon. E cuestion importante ta, ta mantencion. Si no mantene un luga unda sea cu trah’e, e ta haya problema y depende ki material uza y con bon ta planea e mantencion. Esaki por wak’e tur caminda na mundo y tin cu
conforma tambe cu ora cu construi algo den e parti di e costo di operacion tin cu bin un suma anual pa operacion so, ta costa mas placa na fin di dia.

Pa remodela no tin un prijs, pero pa yega na un prizon nobo e por yega hasta te 50 miyon florin. Un remodelacion por laba mas of menos 10 miyon florin, si kier haci’e manera mester ta, e minister a comenta.