– “Na prome luga laga mi felicita boso tur cu e diploma boso ta bay ricibi. Tambe mi kier a felicita CMB cu e escogencia pa bin cu e curso aki,” Minister di Husticia, drs. Arthur Dowers a indica. Loke cu su persona por a compronde ta cu e CMB a percura pa paga e gastonan di e curso y e ta kere cu esey ta un set hopi sabi. Criminalnan a bira hopi mas sabi pa ora ta trata ladronicia. Nan ta pensa prome con nan ta bay actua. P’esey e mandatario ta kere e curso cu CMB a organisa pa trahadonan di siguridad ta bon y ta spera cu otro areanan di siguridad tin e oportunidad di haci cursonan asina.
Ora cu tin un risico pa un banco, esey ta nifica cu ta un risico pa un otro banco tambe. Y si nan por logra na un banco dal un bista, pa motibo cu aworaki banco ta bon forma y ta mira por ta na un otro banco e risico cu tin, un otro banco ta wordo informa y asina ey ta preveni cu algo por pasa por ehempel na un CMB, segun e mandatario.
Oportunidad pa haci curso
El a sigui indica cu e ta kere cu CMB tabata sabi di a inclui tur esunnan, tur e diferente banco den e curso aki. “Mi ta spera tambe cu lo mira oportunidad den esaki y no solamente den area di banco pero otro areanan tambe di siguridad,” Minister a indica. E parti di siguridad ta hunga un rol hopi importante den e mantenemento di siguridad riba Aruba.
Criminalnan mas sabi
“Nos sa cu tin paisnan caminda cu tin cu tur porta cu bo pasa, di tienda, por mira un trahado di siguridad para. Bo ta mira no tur ora necesariamente nan ta bisti den uniform y si bo cara den cierto ciudadnan mundial, bo ta mira cierto hende na bachi.” Hopi caminda den mundo, por mira awendia e necesidad di siguridad a bira un di e tema hopi mas importante. Tin hendenan cu a bira hopi mas sabi, e mandatario a sigui bisa. Criminalnan a bira mas sabi cu antes. Antes nan tabata bay un caminda, horta algo y nan ta conforme. Pero awendia nan ta pensa, plania bon y despues ta purba saca mas tanto di e ladronicia of e acto cu nan a comete.
Mas consciente
Esey ta nifica cu esun cu ta traha pa proteha e luga mester ta mas consciente di esey y mester ta prepara na momento cu nan yega. “Simpel, bo ta corigi y esey nos tur sa. Specialmente den nos area di husticia cu tin hende, aunke cu nos ta pone hopi hende disponibel pa wanta e siguridad di un pais, manera di nos. Semper bo ta core risico.” Echo importante ta cu mester prepara, mester tin conocemento, mester trata tur documento di e risiconan, preveni pa algo pasa y tambe cu ta suma importante limita e riesgonan.
“Ora bo ta bon prepara y bo sa con pa actua na momento cu tin cualkier risico, bo ta reduci risico pa bo mes. Hopi importante bo ta haya na tur esunnan cu ta den un establecimento na e momento aki. P’esey mi ta kere cu boso nan a wordo prepara, y cu bo ta contribuyendo na e siguridad di nos tur na e pais akinan, tur hende cu ta bishita nos,” e mandatario a bisa. For di husticia nos ta sumamente orguyoso y mas cu tur cos contento. Un palabra di pabien pa boso tur, danki pa haci e trabou aki, SCIENTIA tambe pa boso contribucion na e curso aki. Y mi ta spera cu den futuro nos por sinta mas momentonan asina akinan cu gruponan mas grandi di empleadonan di siguridad profesional di nos pais,” el a indica.
