Durante un conferencia di prensa di minister di Enseñansa, Ciencia y Desaroyo Sostenibel, Armando ‘Rudy’ Lampe a papia tocante situacion di scol Paso pa Futuro y scolnan na San Nicolas.

Lampe a menciona cu Paso pa Futuro ta un scol di muchanan special y cu tur mucha ta inteligente y cada persona tin otro tipo di inteligencia mas desaroya. “P’esey nan ta merece e educacion cu ta pas pa nan, pasobra cada mucha tin su talento.”

Ademas, el a bisa cu dia 5 di februari el a haya un carta di director di SEPB Aruba, cu tabata bisa cu danki na e maneho cu Lampe a duna, lo mester separa loke ta scolnan ‘moeilijk lerende kinderen (MLK)’ di situacion den cual un mucha tin mester di otro tipo di atencion, como problema di conducta por ehemplo, tin cu duna nan e tipo di atencion ey.

El a señala cu door di su insistencia, el a haya 15 mucha pa nan por bay SPO (enseñansa secundario pa MLK). El a bisa cu su maneho ta pa separa e muchanan y wak si tal tipo di scol ta adecua pa nan si of no. Di e 15 mucha aki cu a stroom door pa EPB un di nan so a bay SPO, 14 di nan tabata pa otro tipo di enseñansa. Door di e maneho aki – unda cu muchanan cu tin mester di atencion di conducta por ehemplo, tin un scol special pa nan – e cantidad di mucha pa scol di SPO a baha.

Aworaki, cabesante di scol Paso pa Futuro a presenta un proposicion pa crea Scharnier klassen na SPO Santa Cruz. El a splica cu den ultimo añanan a haya cu na scolnan ey a crea un zevende klas y no por tene un mucha cu ya ta adolescente cu ta birando grandi cu muchanan chikito. P’esey e adolescentenan aki mester bay pa SPO na Santa Cruz.

Lampe a sigura cu ta trahando riba e proposicion di cabesante di scol Paso pa Futuro, tumando na cuenta e aspectonan aki y cu e scol lo tin menos cu 100 mucha. “No ta cuestion cu nos ta dividi scol, no. Pasobra e ta keda un ekipo, solamente cu e adolescentenan no ta bay na zevende klas mas, nan mester stroom door pa bay SPO Santa Cruz”, Lampe a manifesta.

For di un aña atras cu Lampe a cuminsa trece dilanti cu ta papiando cu cabesante di scol, el a sigura cu e cabesante a acepta cu na e momento ey, e edificio cu nan a destina na Sero Blanco mester ta bon pa e muchanan por bay eynan. Esaki pa motibo cu e edificio cu tin aworaki, cu ta Mater Dei School Aruba, ta un edificio traha pa mas di 300 alumno, loke ta trata di un edificio grandi. Y ora Lampe a bira minister, el a haya señalnan di e ekipo di Beatrix School cu no lo kier keda cu dos ekipo separa.

Di esaki, el a sigura cu e situacion di nan na gobierno anterior tabata cu e ekipo a dividi, algun klasnan tabata tuma luga na YMCA Dakota y otronan na Sero Blanco. “E team tabata sinti cu esey no tabata sano y nan tin rason, pasobra si bo ta un scol, bo mester ta como un ekipo hunto”, Lampe a declara.

Asina mes el a trece dilanti cu nan ta bay amplia Beatrix School, pa motibo cu e cantidad di alumno na Playa y Noord cu ta na scolnan publico ta birando mas grandi. P’esey nan a bin cu mas klas na scol Kudawecha, Princes Amalia y Arcoiris, cu tambe ta haciendo cambionan pa bin cu un scol primario, loke ta nifica cu nan ta ampliando e cantidad di scolnan publico.

“Esaki no ta trata cu nos ta duna menos atencion pa nos muchanan special, al contrario, nos ta trahando pa nan por haya e atencion cu nan ta merece”, Lampe a señala.

Di mesun manera, el a comenta cu na augustus lo cuminsa cu un enseñansa secundario nobo pa muchanan special na scol Dornasol. Y nan ta trahando pa duna e apoyo di expertonan y specialistanan pa muchanan special. “P’esey e facilidad di Sero Blanco, pa e cantidad di mucha di Paso Futuro tin loke ta adecua pa nan y si mester añadi extra facilidad pa nan, nos lo zorg pa esey den dialogo cu docentenan”, Lampe a afirma.

Di otro banda, pa loke ta trata scol di San Nicolas, Lampe a señala cu e cantidad di alumnonan ta bahando den area aki. P’esey el a comenta cu tin cu wak cu na e momentonan aki e cantidad no lo aumenta, y pa e motibo ey mester haya cooperacion di tur scol cu ta na San Nicolas.

Te awor ni un decision a wordo tuma al respecto. Loke nan a haci ta un intentieverklaring ,cu ta trata di un intencion cu a wordo expresa. Y awor ta bay cuminsa e dialogo cu lo tuma full e aña escolar nobo. Y si na final, tanto e docentenan como e directiva di scol bisa cu no ta conveni pa ni un di dos parti, e no ta bay door.