Durante un ultimo programa informativo den formato online di minister di Enseñansa, Ciencia y Desaroyo Sostenibel, Armando Rudy Lampe pa aña aki, el trece dilanti cu proximo aña lo ta un temporada di eleccion y nan lo kier haci cierto ahuste. Ademas el a duna un reflexion riba con aña 2020 tabata pa enseñansa.

El a splica cu aña 2020 tabata un aña di hopi reto y desafio pa loke ta trata enseñansa y hopi dificil pa famianan cu a perde nan trabou of un ser keri pa via di pandemia Covid-19, cu a golpia grandemente e isla y tur loke ta stress financiero riba bida di famia.

“Nos a enfoca riba e crisis, pero e crisis por duna oportunidadnan nobo”, Lampe a sigura.

El a menciona cu siman pasa e tabatin un encuentro virtual cu organisacionnan di Nacionnan Uni di diferente pais. Lampe a menciona cu loke el a siña di e aña aki cu ta trata di Innovacion y Educacion ta e tratado di nan cu ta papia di derechonan riba educacion pero den e mente di algun personanan a identifica derecho riba educacion cu derecho riba scol, cu un mucha mester ta na scol pa e por ricibi educacion.

Segun minister Lampe, Unesco mes a bisa cu for di 13 di maart ultimo cu Covid-19 a yega, 1.5 biyon mucha a keda sin bay scol pa motibo cu scolnan a cera pero esey no ta nifica cu e mucha su derecho riba educacion a wordo ‘delete’ of a wordo cera, “independiente di un crisis e derecho ey ta keda intacto” minister Lampe a afirma.

P’esey scolnan a cera y cada rato ta habri y ta cera bek, como por ehemplo, Colegio Arubano cu mester a cera pa via di Covid-19, pero esey no ta kita cu mucha no tin derecho riba educacion y segun minister Lampe esey ta e les di mas grandi pa aña 2020.

Pa loke ta trata innovacion cu a cuminsa for di algun aña pasa den educacion “E Learning” den scolnan y tambe cu situacion di Covid-19 a acelera esaki grandemente, te ainda ta existi contra tempo pa lo cual ta e mentalidad den grandi scala den comunidad riba derecho di educacion y derecho riba scol, di esaki el a expresa cu te ainda esey no a tuma luga, ni na nivel di profesionalnan tampoco a realisa e nivel di esaki.

“Nos vision a premira sin sa kico ta bay pasa, pasobra prome cu Covid-19 nos tabata papia cu mester digitalisa nos enseñansa”, minister Lampe a comenta.

Tambe el a trece dilanti cu el a tene un reunion cu Fundacion Lanta Papiamento na unda e mayoria di su miembronan tin mas di 60 aña y tur di nan tabata conecta via online, el a califica como un tremendo reunion, cu normalmente esaki tabata tuma luga na Biblioteca Nacional pero cu pa via di Covid-19 esey no tabata posibel. Akinan escritornan di aña 2020 a publica un buki den papiamento a haya e oportunidad pa present’e den algun minuut. “Den e sentido aki mi ta mira cu mas hende a cuminsa realisa cu e mundo aki ta bira un mundo digitalisa” el a sigura.

Tambe, el a conta cu te ainda tin algun personanan cu den nan nivel ideologico no a realisa cu derecho riba educacion ta un cos y derecho riba scol ta otro.

Pa e motibo aki, minister Lampe a sigura cu nan a bin cu iniciativanan nobo unda cu nan ta purba laga e muchanan mes na scolnan nobo cu nan a habri virtual na unda nan ta topa otro via online y nan ta siña den nan ritmo.

Asina mes, minister Lampe a duna di conoce cu den dianan aki el a papia cu Fundacion Respaldo na unda nan a bisa cu problemanan mental na Aruba a crece enormemente y nan no tin suficiente personal tur e problema cu nan tin, “nos a enfoca hopi riba FASE, subsidio di salario, con pa yuda financieramente, parti cuminda, pero nos no a papia kico e crisis aki 2020 tabata nifica mentalmente pa cada Arubiano”, el a enfatisa.

Loke ta nifica cu e pandemia a accentua e problema y a accentua cu e educacion no a educa e hende pa esey, cu por afirma cu salud mental no a haya e atencion debido pa hopi tempo pasa y awor cu e crisis comunidad den su totalidad ta enfrentando un temporada duro cu tur stress y cu mester pone atencion riba salud mental y con importante e ta.

Ademas, minister Lampe a menciona un di su logronan di aña 2020, siman pasa el e pone su firma na unda cu pa prome biaha ta bay tin un maneho y control financiero riba tur loke ta subsidio pa directivanan di scol, asina mes, el a sigura cu finalmente nan a yega te eynan pa motibo cu te aworaki no tabata existi un maneho y control financiero riba presupuesto di enseñansa.

“Den presupuesto di enseñansa no tabata existi ni un planning financiero y pa esaki ta bay tin un control estricto y no ta bay tin mal gastamento di placa por nada den enseñansa” el a señala.

Pa 2021, el a anuncia cu nan lo tin programanan mas corto pa motibo cu otro partidonan tambe ta bay tin nan programanan cu nan informacion, “pa otro aña di eleccion pueblo ta bay husga nos pa wak si nos a maneha e placa di pueblo di un manera responsabel”.

Pa finalisa, el a desea pa tur maestro di scol y muchanan un feliz dianan di Pasco nan unda nan lo por disfruta a pesar di pandemia y na unda e dianan aki e famianan ta mas uni cu otro.