Ayera mainta den un conferencia di prensa di Minister di Enseñansa, Ciencia y Desaroyo Sostenibel, Armando ‘Rudy’ Lampe, el a trece dilanti e preocupacion cu gobierno tin tocante e expresion di violencia cu comunidad a conoce den dianan aki involucrando muchanan di scol.
Lampe a expresa cu esaki no ta un caso di violencia verbal so, sino tambe ta trata violencia fisico entre hobennan cu ta bayendo scol y el bisa cu esey ta un refleho di e sociedad y loke ta pasa den mundo en general.“Bo tin cu wak di biaha di unda esey ta bin.”
El a sigura tambe cu a keda den shock ora el a lesa un caso di posibel abuso sexual di diferente muchanan door di un adulto. Lampe a manifesta cu si un mucha ta victima di abuso of violencia na cas, con e ta bay comporta su mes? Si ta esey e ta wak na su cas y ta wak esey como algo normal, e ta bay reacciona door di violencia fisico pa motibo cu e ta biba den clima di violencia fisico na cas.
El a duna di conoce cu lo bay cuminsa cu un campaña pa bisa cu violencia fisico, dal mucha ya no mester ta tolerabel mas, si no e mucha ta mira esey como normal y ta bay dal otro muchanan.
Di mesun manera, el a informa cu e otro campaña lo ta riba abuso sexual, pa mustra e comunidad cu esey no ta algo normal. “Nos no mester acepta esey”, Lampe a señala.
“Nos mester ta hopi preocupa cu tur e señalnan aki di violencia, pasobra na final, muchanan nan ta y esey ta e refleho di loke ta pasando sea na cas, den nos sociedad of riba internet, cu nan ta wak esey como algo normal”, Lampe a finalisa.
