Ayera mainta durante conferencia di prensa Minister di Transporte, Integridad, Naturaleza y Asuntonan di Adulto Mayor, Ursell Arends, a anuncia e campaña di microchipping pa mascotanan. E meta di e campaña aki ta pa yuda combati e problematica di pushi y cacho riba caya na Aruba.
E tema di poblacion grandi di pushi y cacho riba caya na Aruba ta uno cu gobierno tin hopi aña caba ta purba di combati y hopi accion a wordo tuma durante e ultimo añanan.
“E problematica aki di cacho riba caya, nos no por culpa e bestianan y nos tin cu cuminsa tuma responsabilidad como doñonan di mascota y cuminsa atende cu nos propio comportacion”, Minister Arends a remarca.
Diariamente kehonan ta drenta na Ministerio, segun Arends ta indica, como na tur e instancianan cu ta zorg pa ciudadanonan tene nan mes na e ley di cacho.
Durante e conferencia Minister Arends a splica con gobierno ta bay colabora cu e Asociacion di Veterinario pa asina hunto nan combati e problema aki.
El a enfatisa cu ta hopi importante pa cada doño di cacho ta na altura di su responsabilidad pa su mascota pa por sigui ehecuta e ley di cacho di un forma efectivo. Pa combati e problematica di sobrepoblacion e forma con gobierno lo haci esaki ta a traves di un data base central cu lo fungi pa registra e mascota. E registracion aki ta mara na un campaña di microchipping pa e mascota.
Minister Arends a sigui splica cu e database central lo duna un bista no solamente di e cantidad di cacho y pushi cu tin na Aruba, pero tambe informacion di rasa, di genero, di e doño y e area unda e mascota aki ta residencia. Ademas di esaki e microchip lo duna e mascotanan tambe nan propio identidad.
“Nos kier anuncia cu desde awe nos ta lansa un campaña di microchipping cu e colaboracion di cinco veterinario cu lo ta encarga pa brinda e servicio di chip cada un di e mascotanan aki y brinda e consulta na e ciudadanonan”, el a señala.
E prijs durante e campaña lo ta un costo di 25 florin. Minister a menciona cu Gobierno lo subsidia esaki y den cuadro di e subsidio aki cu Gobierno ta brinda na e microchipnan, esaki ta reduci tambe e gasto pa haci e microchipping mas pagabel pa cada ciudadano.
E prome entrega di microchip a tuma luga ayera y un total di cinco mil microchip lo wordo parti entre e cinco veterinarionan.
Pa registra un mascota y pa haci un cita pa microchip, Minister Arends ta haci un yamada na e comunidad di Aruba pa registra na e website arubapetregistry.com y aki riba lo tin mas informacion di e campaña.
