Manera ta conoci, taxistanan na Aruba tin dos dia ta protesta contra e maneho nobo cu minister di Transporte, Ursell Arends, a anuncia siman pasa. Dialuna e taxistanan a cuminsa nan protesta dilanti di bestuurskantoor y a blokea caminda. Ayera representantenan di e grupo di taxista a reuni cu minister Ursell Arends pa asina trece dilanti nan malcontento.

Mientras e representantenan di e grupo di taxista tabata den reunion cu minister Arends den bestuurskantoor, un grupo grandi di taxista tabata pafo di bestuurskantoor wardando riba e resultado di e reunion.

E mainta a cuminsa calmo y taxistanan tabata simplemente wardando pacificamente pa e reunion termina. No tabatin blokeo di ningun caminda y tur cos tabata canando trankilamente.

E reunion, cu a cuminsa pa 10:30 di mainta, a termina despues di merdia, alrededor di 2or di atardi y segun e representante di e taxistanan a informa, nan no a logra yega na un acuerdo cu minister Arends, ken ta para firme riba su posicion tocante e maneho nobo cu lo drenta na vigor proximamente.

E representante di taxistanan a informa tambe cu dia 16 di augustus tin otro reunion cu minister Arends riba agenda pa asina sigui cu e dialogo y purba yega na un acuerdo pa calma e malcontento cu ta reina entre e taxistanan.

Un di e puntonan principal di e taxistanan ta cu nan no tabata na altura cu e maneho nobo aki lo ser anuncia y introduci pronto. Segun Linda Orman, un representante di e grupo di taxista a splica Bon Dia Aruba, esaki ta e di tres beleid cu e minister ta haci sin cu nan ta na altura di dje.

Pues pa e taxistanan e problema principal tabata e falta di comunicacion y dialogo. “Bo ta tuma decisionnan riba bo mes, y esey nos tin cu acepta. Bo tin cu dialoga.”

Segun Orman tambe a remarca, e problema cu nan tin cu e maneho nobo ta cu e ta kitando derechonan di nan, vooral pa e traspaso na momento cu nan ta incapacita of algo pasa nan.

E respuesta di parti di e taxistanan na momento cu a informa nan cu nada no a cambia y cu no a logra yega na un acuerdo cu minister Arends, tabata uno controversial ya cu inmediatamente e animo a cambia di trankilidad pa rabia y frustracion.

Inmediatamente nan a cuminsa grita insulto den direccion di minister Arends y e taxistanan a tuma decision di blokea entrada di puntonan cardinal unda nan ta ofrece nan servicio.

Un di e puntonan aki tabata entrada di waf, cual a un causa un molester grandi no solamente pa turistanan, pero tambe a perhudica comercio den e area. Ademas ayera Aruba a ricibi 12mil pasahero di tres barco crucero.

E protesta aki no solamente a perhudica e bishitantenan di e isla, e gremio comercial cu ta beneficia di e cantidad di turista cu ta bishita e isla, pero tambe ta laga un mal impresion di Aruba.

Un otro grupo di taxista a sali direccion pa aeropuerto y a blokea completamente e entrada desde e rotonde. E accion aki a causa un caos total, strobando tur persona cu mester yega aeropuerto pa por subi nan avion.

No a keda hende otro opcion mas cu cana, for di e rotonde di aeropuerto riba caminda, den solo cayente, pushando nan maletanan, te na aeropuerto pa motibo di e accion di e taxistanan. Polis a presenta na e sitio y despues di dialoga cu e taxistanan, nan a bay di acuerdo pa habri e caminda pa por drenta aeropuerto.

Pa motibo cu e rotonde di aeropuerto a keda blokia, dilanti bestuurskantoor y waf tambe tabata blokea strobando asina trafico di pasa, na otro camindanan di Aruba trafico a pega completamente creando un situacion desastroso di trafico. E situacion a escala di tal manera cu e centro di ciudad a bay plat. Es decir, pa algo cu ta afecta un grupo chikito, a perhudica practicamente henter e isla.

Rabia cu minister Arends, e taxistanan a opta pa haci yamado na prome minister Evelyn Wever-Croes y minister di Turismo Dangui Oduber pa reuni cu nan pa nan por logra yega na un acuerdo, cu for di nan punto di bista ta pa elimina e maneho nobo cu minister Arends a anuncia.

Maneho nobo pa combati benta ilegal di permiso

Den e maneho nobo anuncia siman pasa, ta permiti pa vehiculonan di titularnan di permiso di taxi y “hulpchauffeurs” por ta ekipa pa no mas cu shete asiento, sin conta e asiento di chauffeur, y cu un chauffeur por transporta no mas cu shete persona den e vehiculo.

Minister Arends a remarca cu e cambio di maneho ta para e traspaso di permisonan entrante 1 di september 2024 y combati e benta ilegal di esakinan. Asina por stimula un sistema mas husto y transparente. El a splica mediante un comunicado di prensa cu e motibo di e decision aki ta pa crea oportunidad igual pa ciudadanonan por yega na remarca pa un permiso, na luga di mantene e situacion cu hopi permiso ta keda circula den e mesun gruponan, limitando e oportunidad igual di otro ciudadanonan pa yega na remarca.

Ademas, segun un comunicado di gobierno, durante hopi aña a bende permiso di taxi ilegalmente pa suma di te hasta 90,000 florin, creando un mercado clandestino cu ta kita e chens pa otro ciudadano tambe por opera legalmente den e industria aki. E sistema di permiso di taxi pa añas a crece “krom”, den cual a pretende cu permiso ta nan propiedad y por bira herencia personal siendo cu tur permiso ta di pais Aruba.

Traspaso di permiso no ta un derecho di taxista. Ta na e Minister di Transporte pa a base di su maneho traspasa of no traspasa. Cu e decision ministerial di 31 di juli 2024, Minister di Transporte a anuncia e cambio di maneho entrante 1 di september 2024. E regulacion nobo ta enfoca na habri caminda pa mehoracion significante den e industria di taxi. Cu un sistema mas husto y transparente, Ministerio di Transporte por aborda otro desafionan manera pensioen y condicionnan laboral cu finalmente lo beneficia tur chauffeur di taxi.