“Na ningun momento e fundacion ta ricibi subsidio pa salario”

Recientemente na nos mesa di redaccion a drenta informacion di forma anonimo cu tabata señala un conflicto di interes cu tin di haber cu un trahado di e Ministerio di Asuntonan pa Adulto Mayor.

Segun e informacion cu Bon Dia Aruba a ricibi, e conflicto di interes ta cu e trahado en cuestion lo ta eherciendo dos funcion publico. Esaki a trece cune e pregunta si e persona aki ta cobrando dos salario for di gobierno. Bon Dia Aruba a acerca Minister Arends pa asina duna un aclaracion amplio ariba e caso aki.

Den e documento anonimo cu a yega nos mesa di redaccion ta cuestiona con ta psoible cu e trahado en cuestion, sr. Jeffrey I. Matos, ta ricibi pago di salario pa su funcion como ‘project leader’ di un proyecto cu ta cay bao di Ministerio pa Adulto Mayor, mientras cu ainda e ta eherciendo su funcion como director di Fundacion Club Kibrahacha y ta ricibi subsidio pa e fundacion aki.

Reportero di Bon Dia Aruba a acerca Minister Arends pa asina por trece claridad kico ta e situacion den e caso aki. Den su contesta Minister Arends a splica cu e consehero, sr. Matos, ta un experto riba e tereno di cuido di adulto mayor cu su persona a acerca pa asisti’e den su Ministerio pa Adulto Mayor.

“Ta prome biaha den historia cu Aruba tin un ministerio pa atende cu tanto necesidad cu tin cerca e adultonan mayor riba nos isla. Esaki ta un terreno cu a wordo neglisha enormemente y cu ta exigi esfuerso grandi. P’esey mi a acerca hendenan cu tin no solamente conocemento, pero tambe trayectoria y curason pa e tema,” el a remarca.

Minister Arends a indica cu sr. Matos a bin hopi bon recomenda pa hendenan cu ta “goza di su confiansa” y cu pues e trayectoria di sr. Matos ta papia pa su mes. El a sigui splica cu na momento cu el a acerca sr. Matos pa asisti’e den su ministerio, nan a yega na acuerdo cu Club Kibrahacha pa haya asistencia temporalmente di sr. Matos.

“E fundacion ey tambe ta mira importancia pa un persona cu capacidad manera sr. Matos asisti Gobierno di Aruba cu un proyecto cu ta asina grandi y esencial pa nos adultonan mayor, no solamente esunnan cu tin beneficio di tur loke Club Kibrahacha ta brinda,” el a resalta.

Pa e motibo ey, el a enfatisa, fundacion Club Kibrahacha, te ainda e dunador di trabao di sr. Matos, a aproba pa e asisti e Ministerio pa Adultonan Mayor. Pa haci esaki posibel, el a indica, a yega na un areglo di empleo “deeltijd” (part-time).

El a agrega cu tareanan di sr. Matos den su ministerio ta specifico y e ta asisti primordialmente cu e preparacion di e maneho di Asuntonan di Adulto Mayor. El a subraya cu e tareanan cu sr. Matos ta desplega ta totalmente separa di e relacion di subsidio cu Gobierno di Aruba tin cu e Fundacion Club Kibrahacha.

Mirando e posible conlficto di interes cu por tin den e caso aki, Minister Arends a clarifica cu na ningun momento e Fundacion ta haya subsidio pa salario. “E fundacion ta ricibi 56% subsidio for di gobierno. E subsidio aki ta pa cubri parcialmente e gastonan di transporte y di actividad pa e fundacion. E fundacion mes ta financia 46% di su su otro gastonan di operacion,” el a enfatisa.

Alabes, el a aclaria cu desde 2017 tur fundacion ta ricibi “algemeen” subsidie (subsidio general).

Esaki, el a indica, ta conta pa SABA, Cas Mari y Club Kibrahacha. El a splica cu e subsidio pa tur fundacion cu ta resorta bao di su ministerio, ta ricibi un suma total pa e servicio cu nan desplega pa Gobierno di Aruba y e suma total aki ta wordo dividi den 12 luna.

Por ultimo, Minister Arends a expresa cu e ta “lamenta profundamente cu pa algun tempo caba tin algun persona cu ta hasiendo tur posibel pa mal informa comunidad y crea mal impresion riba hendenan cu ta trahando di buena fe pa yuda crea un fundeshi pa un miho sistema di cuido pa nos adultonan mayor. Pasobra tur hende por confirma cu e sistema actual ta fragmenta y no ta sostenible. Hopi ta traha di bon curason, pero e rol di Gobierno nunca a wordo bon defini, asina lagando hopi di nos adultonan mayor den necesidad.”

Finalisando, el a agrega: “Intencion di esnan cu ta hibando e campaña negativo aki ta pa desvia atencion di e realidad di nan fracasonan. Nan miedo ta cu pronto nan falta di capacidad y e efectonan negativo di esaki inevitablemente lo wordo presenta na publico. Nos lo sa di atende cu nan na e momento adecuado. Pero pa awor nos atencion ta completo riba e retonan cu nos ta atendiendo pa por crea un mihor perspectiva pa nos adultonan mayor.”