Desde cu Gobierno di Aruba a anuncia cu a tuma e decision pa bay casacion pa loke ta e tema di matrimonio pa parehanan di mesun sexo, diferente grupo y organisacionnan a express nan reaccion pa cu e noticia aki. Partido Raiz a tene un conferencia di prensa ayera caminda nan a ratifica nan posicion pa loke ta trata e tema aki.

Minister di Transporte, Integridad, Naturalesa y Asuntonan di Adulto Mayor, Ursell Arends, a splica cu e obhetivo di e conferencia aki tabata pa informa comunidad di e posicion di plataforma Raiz pa loke ta tema di casacion pa matrimonio di parehanan di mesun sexo.

“Idelamente nos plataforma y nos como ministernan di Raiz no lo a desea pa gobierno bay den casacion, pero nos ta respeta democracia y esaki ta loke a tuma luga y nos ta en espera pa e debate publico por wordo hiba den Parlamento di Aruba y asina e ley por wordo aproba caminda lo garantisa derecho di igualdad y mas cu tur cos inclusion,” asina Minister Arends a remarca.

El a subraya cu e tema aki enbes di crea union den comunidad ta creando hopi division y loke plataforma Raiz ta para pe, un di e puntonan principal di nan plataforma y cu ta un di e puntonan principal di nan principionan, ta inclusion y el a enfatisa cu esey ta loke nan kier logra na momento di trata e tema aki.

Arends ta indica cu hopi hende ta lubida cu ora ta papia di igualdad y matrimonio di mesun sexo, loke nan ta papia di dje ta di ser humano. “E ser humanonan aki mester wordo garantisa cu nan ta wordo respeta den e comunidad aki y esey ta loke Raiz ta boga pe, esey ta e ruta cu nos a encamina pa nos por garantisa cu den Parlamento e debate publico aki por wordo hiba y una bes e ley wordo trata y aproba, esey lo garantisa e igualdad, e inclusion cu e comunidad LGBTQ+ pa decadas ta boga pe na Aruba.”

El a splica cu nan ta wak e ley como un instrumento, un herment, pero nan ta wak tambe tur e otro aspectonan cu mester wordo agrega na e esaki, aspectonan cu mester tuma luga pa asina e grupo aki den comunidad tambe por wordo garantisa e inclusion necesario.

E ehecutivo a recorda cu desde inicio como plataforma nan a para pa derecho di igualdad y inclusion, sin importa di unda e persona ta bin, su color di cuero, tampoco e religion cu e ta escoge y mucho menos ken e ta desea di stima. “Bo mester wordo garantisa e derecho di igualdad riba nos isla y esey ta loke Raiz lo sigui para pe,” el a enfatisa.

El a menciona tambe cu den algun medio di comunicacion bisa cu Raiz a dobla. Arends ta ratifica cu “Raiz no a dobla na ningun momento” y cu nan ta sigui para firme pa nan principionan y cu nan lo garantisa igualdad pa cada un di e ciudadanonan na Aruba

Por ultimo, el a agrega cu el a tuma nota cu varios caminda ta menciona cu e tema aki mester bira un tema di referendum. El a remarca cu ora cu ta trata di derecho di ser human, e no ta un tema di referendum, pero cu tanto gobierno como Parlamento mester asumi nan responsabilidad y garantisa a traves di legislacion pa tur ciudadano den comunidad por tin e derecho di igualdad.

Minister di Economia, Comunicacion y Desaroyo Sostenibel, Geoffrey Wever, a indica tambe cu mirando e discusionnan cu a tuma luga den fin di siman, ta importante pa nan como partido Raiz pa reconfirma y reafirma, nan posicion y enfatisa cu nan ta para pa igualdad y inclusion.

“Nos a menciona esaki na varios momento y nos no a cambia nos posicion. Nos ta orguyoso cu parlamentario Misha Raymond ta co-firmante di e ley di iniciativa cu ta bay haci igualdad posibel na Aruba. Nos ta orguyoso di e particpacion ey y nos sa cu nos plataforma lo vota na fabor di e ley aki ora cu e wordo trata den sala di Parlamento y den e sentido ey mi ta kere 2023 ta bay ta un aña historico pa Aruba y mi ta kere cu nos como plataforma por ta orguyoso tambe di nos dos parlamentarionan cu lo bay vota na fabor di e ley aki,” Wever a remarca.

El a splica cu nan a scucha diferente opinion y nan a comparti nan pensamento cu diferente organisacionnan den comunidad, pero pa nan ta importante pa reafirma y confirma cu nan ta para pa igualdad y e parlamentarionan di Raiz ta bay vota na fabor di esaki. “Mi ta kere cu esey nos ta bay haci un cambio real den e panorama no solamente huridico, pero pa nos personanan cu ta biba na Aruba.”

Minister Wever a subraya tambe cu hopi ta lubida cu e tema aki no ta solamente casacion y ley, e topico aki ta trata di personanan, di hendenan y esey, pa Raiz, ta hopi importante pa hiba back den e discusion aki, sobretodo e parti di respet.

“Ora nos papia di e topico aki nos por papia cu respect pa cada persona pasobra nos a wak cu tin gruponan den comunidad ta expres nan mes di un forma mi ta kere no respetuosamente pa e grupo aki y esey ta algo cu nos, en todo caso, kier contribui tambe na e momento aki den e discusion aki pa nos corda cu nos ta papiando di hende, di ser humano cu tin famia, cu tin amgionan y cu nan merece di haya un trato igual, un trato riba nivel un trato di respet.”