Compania, individuonan a presenta ideanan pa reuso di desperdicio; nan lo contribui na formulacion di maneho

Un luga centralisa, segun normanan internacional pa separa e diferente fluho di desperdicio y conscientisacion cerca muchanan na scol pa motiva mayornan pa anda mas responsabel cu sushedad. Eseynan ta obhetivonan pa por cera Parkietenbos. Pero prome cu esey , panelistanan, expertonan riba tereno di hende, planeta y prosperidad (people, planet and prosperity) awor tin 24 idea/presentacion pa analisa y evalua e miho direccion. Di e forma aki Minister di Transporte, Integridad, Naturalesa y Cuido di Hende Grandi, Sr. Ursell Arends por formula e maneho di desperdicio na Aruba.

For di e presentacionnan aki lo sali proyectonan cu ta bay maneha e fluho di sushi na un forma sostenibel y ta elimina e necesidad pa hiba desperdicio pa Parkietenbos e aña aki ainda. Asina un Minister entusiasma a splica na final di e asina yama ‘Pitch to Switch,’ esta e presentacion di ideanan pa un maneho di desperdicio cu por nifica negoshi pa companianan (Trash to Cash) y kibra e ciclo di benta sushedad na un dump.

“Nos a haci un promesa dia 22 di Februari ultimo pa reduci, recicla y reusa desperdicio na Aruba. Esaki ta un promesa cu nos lo haci tur nos esfuerso pa cumpli cune.” Minister Arends a bisa cu no ta un promesa di dje so, sino di henter un comunidad, pasobra pa logra, mester di cambio di mentalidad.

Conclusion aki dos siman

Un total di 31 compania a registra pa por presenta nan idea, esta pa nan ‘pitch’ nan plan. Pero na final 24 a logra realmente haci un presentacion di kico nan vision ta. Entre e 24 tabata inclui dos hoben, dos studiante cu mester a pidi permiso pa tuma oranan liber di scol pa por a bin presenta nan idea, algo cu a yena e Minister cu hopi alegria. “Nan a presenta nan idea riba maneho di desperdicio y con pa converti esaki den energia. Pues, mi por bisa cu 24 presentacion, 24 pitch, a duna mi garantia, y mi ta convenci cu nos ta hopi mas cerca di e solucion.” Pa Ursell Arends e tempo pa papia a pasa y awor mester tuma decision pa solucion y locual el a mira, ta e solucion ta biba memey di companianan local cu tin e experticio con pa atende cu desperdicio y yega na solucion structural. “Esey pa mi ta e parti primordial, esta pa trece tur e experticionan hunto, pa nan brinda nan idea y conocemento.”

Den e siguiente dos siman, e grupo di panelistanan – cu segun e Minister ta personanan independiente – lo traha riba nan conclusion y presenta esaki na Gobierno. Unabes cu esaki ta conclui lo traha cu e actornan corespondiente, esta e ‘stakeholders,’ pa yega na un maneho di desperdicio cu ta necesario.

“Fuera di e maneho di desperdicio, nos ta trahando riba cambionan legislativo cu lo cana man den man cu otro. Aki mi ta referi na e landsverordening MER (Milieu Effecten Raportage), e landsverordening Afvalstoffen (desperdicio) y mas cu tur cos, e landsverordening Rechten van Natuur (Derecho di Naturalesa).” Segun e Minister, mester traha riba e aspecto legislativo pa sigura cu ta garantisa derecho di naturalesa.

Parkietenbos mester cera e aña aki

Pa por cera Parkietenbos lo mester cambio di ley mas lihe posibel. Minister mes tin dos hurista specialisa den legislacion ta traha cune y hunto cu Direccion Naturalesa y MedioAmbiente a palabra cua ta e prioridadnan di ley pa traha riba dje.

“Na 2012 a traha riba un landsverordening Proteccion Medioambiente, pero e tabata uno asina grandi, cu a consisti di diferente capitulo. Locual nos a haci ta pa scoge e prioridadnan (cu ta e tres leynan menciona).”

E intencion ta pa e proyectonan di ley ta cla pa fin di e di dos kwartaal di e aña aki, pa por cuminza cana su caminda. Pero cua ta e cambionan specifico ta depende di e maneho di desperdicio cu tambe ta depende di locual e stakeholders priva ta bin cune como nan plan di accion pa e diferente fluhonan di desperdicio. “Aworaki ta trahando riba e concepto. Ta hunto cu stakeholders y recomendacion di panelistanan lo formula e maneho di desperdicio. Por implementa e maneho prome cu introduci e leynan. Tur hende kier pa e candela riba dump paga y e solucion mas lihe ta pa re-dirigi e fluho di desperdicio.”

Den concepto di Arends, na Aruba tin companianan cu entusiasmo y gana pa yuda soluciona e problema di dump, pero cu nunca realmente a haya e oportunidad, ya cu Gobierno mes tabata forma e obstaculo. “E biaha aki nos a laga sector priva bin cu nan solucion y Gobierno lo asumi e rol di facilitador.” Segun e Minister, e obstaculo na cua e ta referi ta e leynan anticua, manera e ley cu ta duna Serlimar e tarea pa recoge y procesa sushi. Esaki a stroba pa sector priva asumi responsabilidad pa desperdicio. “Gobierno ta stipula maneho y criteria y sector priva ta ehecuta.” Pero Minister Arends a bisa cu e lo warda riba e conclusion di panelistanan prome cu e por duna contesta riba e pregunta kico ta sucede si sector priva pa un of otro manera no por cumpli cu e tarea aki.

Dump nobo?

Realidad ta cu te ainda na Aruba no ta separa sushi na cas y Serlimar pa ley tin e tarea pa recoge sushi. E ta nifica cu Serlimar lo mester hiba e sushi un luga central pa un compania por recoge locual e ta encarga pa atende cune. Arends a mustra cu no ta e intencion pa crea otro dump y lo evita esaki pa medio di ley y sistema di permiso. Lo tin norma prome cu yega asina leu. “Tur esaki lo ta den e maneho di desperdicio.”

Di otro banda, algun compania mes a sugeri cu mester bin un MRF, cu ta un luga central unda ta separa e sushi, y for di eynan cada compania lo tuma encargo di e tipo di desperdicio cu e lo por maneha. Pero atrobe ta e panel lo duna su conseho.” Riba insistencia, Arends a admiti cu cierto momento mester hiba e desperdicio na un area centralisa – manera e mes a bisa. “Pero si kier crea un economia circular, no por sigui traha riba Parkietenbos manera e ta awor. Tin ehempel di miho practicanan internacionalmente, cu no tin impacto riba medio ambiente. Y ta den e direccion ey nos kier bay.” Pero mas detaye e Minister no por a duna, ya cu ta ayera numa a haci e presentacionnan.

Pa loke ta e responsabilidad di comunidad, Arends a mustra cu e intencion ta pa pronto cuminza cu programanan educativo dirigi na muchanan di scol, kendenan e ora lo por motiva nan mayornan pa anda responsabel cu e sushedad cu nan mes ta produci.

Panelistanan

E panelistanan cu ta inclui drs. Greg Peterson, Sr. Jurgen van Schaijk di Amsterdam Manor, dr. Paula Kibbelaar, Sr. Stanley Brown di Fundacion Aruba Limpi, pero tambe biologo marino Stacy Brete y nombernan conoci manera dr. Ryan Peterson, Elthon Lampe, Tristan Every, Sietske van der Wal, Kryss Facun, Javier St. Jago, y Dyane Escalona Vis. Tur tin experticio riba nan tereno y segun e Minister, a scoge nan a base di e tres ‘p’-nan, cu ta people, planet y prosperity.

“Tin hende cu experticio financiero, otro riba maneho di negoshi. Tur ta profesional cu a bin hunto pa analisa e ideanan y cu despues mester conseha Gobierno con mester sigui dilanti. Mi ta convenci cu nos tin e personanan capacita pa duna nos e conseho necesario pa yega na e solucion structural cu nos tur kier.”

Algo yamativo ta cu Caribbean Trucking tambe tabata entre e companianan cu a presenta su idea con pa maneha desperdicio. Ta e compania cu ya caba ta haciendo trabao pa Gobierno, incluso maneha e Incinerador y Ser’i Teishi.