Durante conferencia di prensa ayera mainta, Minister Ursell Arends a duna un reaccion riba e comentarionan di ex-minister y politico Sr. Otmar Oduber, tocante e maneho di desperdicio cu e minister actual ta hiba.
Diahuebs ultimo, ex-minister y politico Otmar Oduber a tene un conferencia di prensa na unda el a indica cu e maneho di desperdicio cu e Minister di Naturalesa actual, Ursell Arends, ta hibando no ta dunando ningun resultado y ainda no a bin cu un solucion.
Oduber a indica cu na momento cu Minister Arends a asumi su responsabilidad como Minister di Naturalesa, el a “yega y a haya tur cos cla y haya un ley cla pa Serlimar.”
Contestando un miembro di prensa ariba e comentarionan aki, Minister Arends indica cu e manehonan cu Oduber a laga atras “no tabata hole bon, nan tabata hole malo y p’esey Sr. Oduber ta na unda e ta aworaki.”
El a ratifica cu p’e, Oduber ta un “politico irevelante na e momentonan aki.” E mandatario a bisa cu un dia el lo top’e na cualkier plataforma ora cu mester hiba debate como politico y pues e ora ey e lo duna su reaccion completo y atende cu e comentarionan di Sr. Oduber.
“Pero pa mi e ta un politico irelevante y pa ta mas honesto, den placa chikito, warawara no ta gasta su tempo pa casa musca,” el a remarca.
Minister Arends resalta cu semper e ta revisa y ta zorg pa analisa su maneho y conhuntamente cu su team nan ta analisa e maneho constantemente. “Tin espacio pa mehoracion, pero mi ta convenci cu nos ta den e bon proceso, nos ta riba e bon caminda,” el a subraya.
