Ayera durante un conferencia di prensa minister demisionario di Transporte, Integridad, Naturalesa y Asuntonan di Adulto Mayor, Ursell Arends, a elabora ariba e ultimo actualisacionnan pa loke ta e topico di transporte publico.

Un punto cu Bon Dia Aruba a trece dilanti recientemente relaciona cu transporte publico ta e punto di tarifa di taxi, specificamente e lista di prijs. Den un publicacion anterior Bon Dia a reporta tocante e confusion cu tin entre turistanan pa loke ta e prijs cu taxistanan ta cobra pa transporta nan cierto distancianan.

Un turista a expresa riba rednan social cu el a pasa den un situacion caminda el a sinti cu e taxista tabata kier estaf’e cobrando e mas di loke ta stipula den e lista di prijs cu a wordo implementa di 2018 pa 2022. Reportera di Bon Dia Aruba a puntra minister Arends tocante kico ta e situacion cu e tarifa di taxistanan mirando e confusion cu tin rond di e topico aki.

E mandatario a indica cu nan tambe a tuma nota di tur e comentarionan cu ta bin di varios di e paginanan di turistanan cu ta duna comentario riba e prijs di taxi.

Pa loke ta trata e landsverordening personenvervoer, el a splica cu esaki no ta papia di un lista di prijs, pero ta papia di un taxi meter. Pa esaki, el a sigui splica, un compania a duna un presentacion na tur representante di taxista, kico ta e opcion cu tin cu por persigui hunto como gobierno demisionario y den cooperacion cu e taxistanan pa introduci un aplicacion y taxi meter.

Minister Arenda a remarca cu e compania aki ta un di e posbilidadnan pa duna e servicio aki pasobra no por bisa cu seguridad cu e compania aki ta esun cu ta bay provee e aplicacion y taxi meter pasobra mester tene cuenta cu mester pasa den un proceso di destaho publico pa por yega na e compania cu ta bay brinda gobierno e servicio aki.

Mientras tanto cu e ta finalisa e proceso pa un compania, aplicacion y taxi meter, minister Arends a bin cu un proposicion pa fiha un lista di prijs den un fase transitorio y un bes cu e lista di prijs aki ta vigente ta fiha un fecha caminda lo bin cu un aplicacion cu ta conta pa tur e servicionan, no solamente pa taxi pero tambe pa T y O y di e forma aki ta garantisa seguridad, pero tambe informacion, un sistema husto na tur e usuarionan cu ta haci uso di e servicionan aki.

Taxistanan a indica cu falta un tiki tempo mas pa bin cu feedback pa loke ta trata ahustacion di e lista di prijs. Nos lo kier pa e lista di prijs nobo bin vigente prome cu e high season cuminsa pa asina ki nos no mester crea ningun discordia cerca turistanan.

“Esey ta loke nos a palabra cu nan. Nan ta bay haci tarea di nan banda, nos ta bay haci tarea di nos banda mirando cu manera nan mes ta bisa bo no por djis yega bisa mi ta bay hisa e lista di prijs cu cinco dollar pasobra tin caminda cu mester bin ahustacion. Kisas tin caminda e prijs mester baha tin caminda e por subi,” el a indica.

El a ratifica cu su ministerio ta den dialogo cu e taxistanan pa yega den corto tempo na un lista di prijs nobo, cual ta un fase transitorio te ora nos yega na introduci un aplicacion cu ta bay brinda e servicio na tur usuario.

E mandatario a remarca cu kier introduci e lista di prijs transitorio aki prome cu high season cuminsa pa evita cu ta crea confusion of discordia pa turistanan.

Durante e conferencia di prensa minister demisionario di Transporte a anuncia e di dos y oportunidad pa re-inscripcion di peticion pa permiso di taxi, cual ta cuminsa dia 30 di september 2024 y lo termina 14 di october 2024.

Minister Arends a splica cu e posibilidad di re-aplicaccion aki ta pa tur esnan cu den pasado a yega di entrega un peticion pa un permiso di taxi y cu no a haci uso di e prome oportunidad pa re-inscribi via e portal di BID cu a tuma luga entre november 2023 y 1 di februari 2024.

Minister Arends a enfatisa cu e formulario digital ta disponibel solamente pa esnan cu den pasado a yega di entrega un peticion pa permiso di taxi, mirando cu esaki ta e tipo di permiso mas pidi.

El a splica cu pa medio di e formulario digital, lo traha un lista di tur peticion pendiente a base di fecha cronologico cual lo sigura e sistema di “first in, first out” wordo cumpli.

E mandatario a sigui splica cu una bes cu e ultimo oportunidad pa re-inscripcion cera e departamentonan concerni lo cuminsa cu e proceso di inventarisa y pone tur peticion den secuencia a base di e fecha di e prome peticion, segun e documentonan cu a wordo entrega por medio di e portal digital.

Despues cu esaki tuma luga lo informa cada aplicante ki number nan a haya y lo publica e lista tambe riba publico.aw. Asina cada persona sa na ki momento su peticion ta na turno.

Pa loke ta trata peticionnan nobo pa permiso di taxi, minister Arends a indica cu entrante 1 di december 2024 nan ta cuminsa tuma peticion pa permiso di taxi nobo, cualnan mester bay via e portal digital y a subraya cu no lo tuma ningun peticion manual, riba papel mas.

Minister Arends a resalta cu como e minister encarga cu transporte el a encontra varios

reto den transporte publico. Un di e retonan cu el a menciona ta e proceso di pidi

permiso pa transporte publico, entre otro pa taxi, T- of O-.

E mandatario a splica cu hunto cu Bureau Interne Diensten (BID) nan ta trahando duro pa digitalisa e procesonan di Departamento di Transporte Publico pa brinda mas claridad riba e proceso di atende cu peticionnan.

El a remarca cu a cuminsa cu e proceso pa pidi permiso di taxi dia 29 di november 2023. Ministerio di Transporte a lansa e formulario digital pa esnan cu a haci peticion pa permiso di taxi den pasado pa confirma nan interes actual. Manera ya caba menciona e prome oportunidad pa re-inscripcion di peticion pa permiso di taxi a tuma luga den e periodo di december 1, 2023 te cu februari 1, 2024.

E siman aki BID a cuminsa manda un “zaak-nummer” na tur persona cu a re-inscribi durante e prome periodo di re-inscripcion.

Minister Arends a subraya cu e meta ta pa centralisa e peticionnan bou di Departamento di Transporte Publico (DTP) pa yuda trece mas structura y claridad den e proceso di peticion di permiso.

“Nos compromiso ta pa trece transparencia y eficiencia dentro di proceduranan

gubernamental, y e introduccion di e formulario digital ta un parti importante di e avancenan

cu nos ta realisando den e tereno aki,” e mandatario a remarca.