Minister Arends a anuncia apertura di pasadia pa adultonan mayor cu limitacion intelectual

Ayera mainta durante conferencia di prensa minister di Transporte, Integridad, Naturalesa y Asuntonan di Adulto Mayor, Ursell Arends, a anuncia e apertura di otro pasadia pa adultonan mayor cu limitacion intelectual.

E pasadia nobo aki, Pasadia Ambiente Nobo, ta bay habri na Stichting Ambiente Feliz cu pa 20 aña ta brindando servicio na e grupo aki di adultonan mayor cu limitacion intelectual.

Minister Arends cu fondonan cu a wordo aloca pa apertura di e pasadia aki ta garantisa garantisa e continuidad di e servicio y alabes ta trece alivio pa e gerencia, e famianan y esnan cu ta cuida e adultonan mayor.

Actualmente, e fundacion ta atende 35 persona y tin un lista di espera di 14 persona. Cu e fondonan adicional aki e fundacion ta haya e oportunidad yuda mas hende cu e cuido necesario.

Pa loke ta e costonan pa nan clientenan, Lynn Maduro di Stichting Ambiente Feliz a splica, contestando pregunta di miembro di prensa, cu actualmente e costo ta alrededor di 10 mil florin pa aña pa un persona atende e centro. El a sigui splica cu e stichting ta haya un subsidio chikito di Directie Sociale Zaken, pero e no ta suficiente y por paga pa solamente shete pa ocho cliente y tin 34 cliente.

Manera ta conoci tin un lista di espera di adultonan mayor cu mester di cuido y cu ta warda pa drenta SABA. Miembro di prensa a puntra Minister Arends si e apertura di e pasadianan ta yuda cu e lista di espera di e adultonan mayor aki.

E mandatario a indica cu actualmente tin un lista di espera di 173 adulto mayor. El a splica cu expertonan ta bishitando e adultonan mayor cu tin riba e lista pa wak si di berdad nan mester bay den SABA. El a sigui splica cu basa riba e bishitanan aki expertonan ta indica cu no ta tur di nan mester bay den SABA y brindando nan e oportunidad pa asisti na un pasadia caminda nan por tin un dia cu ta organisa y ta brinda nan structura ta yuda evita cu nan mester bay den SABA of cualkier cas di cuido.

“Esey ta e meta tambe mirando cu ora a cuminsa cu e proyecto di pasadia e maneho presenta pa loke ta trata Asuntonan di Adulto Mayor ta basa riba e perspectiva social, ta bay for di ‘medicaliseering’ pa un enfoke social y e punto di salida ta pa mantene e adulto mayor biba mas largo den su hogar y di e forma aki e tin tur comfortabilidad,” minister Arends a remarca.