Tin 7 duanero suspendi, pasobra nan no a cumpli cu nan trabao, awor nan ta sinti cu nan a cumpli cu nan trabao y a wordo obstaculisa riba ordo cu a bin di ariba. E minister Angel Bermudez no sa cu tin ordo cu a bin di ariba pa stop control di Duana riba turista na aeropuerto. Pero den e caso aki e director ta esun yama pa guia y maneha y evacua y dicidi riba tur actividad duanero.
E ta e director y e ta esun cu ta cierto momento e autoridad final den e asuntonan di operacion. Pa loke ta e duaneronan suspendi, por a informa cu diaranson a hisa e schorsmento di esunnan di cual ta premira cu nan lo haya un straf disciplinario cu no ta retiro y esunnan cu si lo haya nan retiro, ta keda geschors y den e cuadra ey, 4 di esnan suspendi, a wordo libera di e schorsmento y nan lo mester cuminsa traha sino diahuebs of dialuna mes.
Aparentemente tres duanero ta loke lo perde nan trabao. E procedura ta reflehando cu nan ta coriendo den e trayecto pa haya nan retiro, e minister a splica. Segun minister Bermudez, esunnan cu ta atende e proceduranan aki cu ta entre otro DRH, hunto cu directorado di Cuerpo di Duana, sa bon cla kico nan tin cu procesa, kico nan tin cu haci ora cu trata di cierto fayonan cu a wordo cometi, y pa nan sa exactamente con nan ta evalua nan, ki peso nan ta duna nan. Nos leynan ta duna exactamente diferente categoria di strafnan disciplinario cu por ehecuta, por aplica den ora cu un trahado no ta cumpli cu su trabao y finalmente a base di e conclusion ey ta duna informacion, e minister a informa.
