Minister Andin Bikker tocante mocion di van Dam: ‘Lo sigui traha cu statuut actual respetando cada otro su posicion autonomo’

Ayera mainta, durante un conferencia di prensa di Minister di Husticia, Andin Bikker, a trece dilanti e topico di reaccion di Minister di Husticia di Reino, Ferdinand Grapperhaus y otro dimension nobo di innovacion den ley pa e-Books.

Manera Bikker a splica, siman pasa el a anuncia cu e lo haci un par di pregunta pa haya aclaracion di parti di Minister di Husticia di Reino, Ferdinand Grapperhaus riba e tema di un mocion cu tin pendiente, pero suspendi na Tweede Kamer, den cual Parlamentario Hulandes Chris Dam (CDA) a propone un cambio di statuut.

Di mesun manera, Bikker a manifesta cu el a haya e noticia via e-mail cu nan lo sigui traha cu statuut actual, respetando cada otro su posicion autonomo y e ta indica cu el a compronde cu e mocion cu ta bay suspendi ta mas bien dirigi pa purba trece e tema aki riba e nivel di Parlamento, y cu no ta dirigi pa gobierno Hulandes.

Bikker a anuncia cu el a compronde cu Parlamento di Aruba a emiti un carta pa Parlamento di Reino, den cual nan tambe ta rechasa e mocion aki y nan lo keda alerta riba e tema, pa motibo cu manera Bikker mes a bisa siman pasa, ‘esaki ta perturba innecesariamente e bon relacion di cooperacion cu nos tin cu Reino pa loke ta trata husticia’.

Ademas, el a bisa cu nan ta keda vigila e situacion di cerca y ta gradici cu colega Grapperhaus a aclaria cu, di parti di Hulanda, ta sigui cu e punto di bista cu na Aruba ta traha a base di respet mutuo y autonomia di cada pais.

Tocante e topico di actualisacion di ley, Minister di Husticia a comenta cu e leynan ta e software di un pais y tin algun di nan cu ta hopi anticua. Por ehempel tin un cu ta data di siglo anterior.

Na e momentonan aki, tin hopi ehercicio cu ta andando tocante esaki y el a señala cu ta bay introduci a corto plaso un codigo corporativo nobo pa Aruba, cu manera Bikker mes a splica, e pais tin decadanan caba cu no ta conoce un actualisacion riba su leynan corporativo y esaki, hunto cu cooperacion di Parlamento, lo bira realidad proximamente.

Tambe a expresa cu tin pendiente un reunion relaciona cu Codigo Civil lo bay Parlamento, pa motibo cu tin un par di aña pendiente y cu lo introduci cambionan, por ehempel, e leynan di herencia cu lo wordo modernisa y otro leynan lo wordo actualisa.

Ta existi un ley, segun Bikker a anuncia, cu ta trata di un concepto di ley di procedemento penal. Tambe el a sigura cu el a presenta otro pa loke ta trata Verzamel Landsverordening, caminda ta bay actualisa diferente leynan cu ta regarda husticia.