Ayera mainta Minister di Husticia Andin Bikker a ofrece un conferencia di prensa pa splica e situacion cu tin di haber cu e mocion di e parlamentario Hulandes van Dam y e comienso di proceso di mantencion di compleho di Corte di Husticia.

Bikker a trece dilanti su declaracion di loke ta trata e mocion di e Parlamentario Hulandes Van Dam, el a bisa cu e mocion aki ta caminda pa propone cambionan den statuut pa haci husticia un tema di Reino.

Tocante esaki, el a confirma cu e mocion a wordo suspendi pero e Parlamentario ta sigui riba e tema y por mira cu e no ta representa un porcentahe grandi di voto, ‘nos ta puntra nos mes, si esaki ta un opinion di Hulanda, pasobra si nos ta wak Hulanda mes, cu tur respet tin diferente retonan’, un di nan ta un reporte cu recientemente a sali den cual ta bisa cu Amsterdam tin retonan grandi pa loke ta trata criminalidad y otro ta un funcionario Den Haag cu a retira pa sospecha di corupcion.

Di parti di Aruba, Bikker a expresa cu e no ta bay papia di retonan, pa motibo cu semper husticia ta keda un cos cu ta keda evoluciona y tampoco lo recomenda pa husticia di nan pa Union Europeo di lo cual nan ta haci parti.

“Nos ta haya hopi remarcabel cu nos ta tuma nota cada biaha cu un parlamentario ta keda insisti riba e tema aki, wak den bo cas prome”, Bikker a sigura.

Di mesun manera, Bikker a comenta cu e argumento di van Dam no ta convence ningun hende, ni Gobierno di Aruba ni Parlamento, el a bisa cu a reuni cu Parlamento den comision di Husticia dos siman pasa y a papia tocante e tema aki y su reaccion ta cu no tin interes riba e tema aki.

Ademas, el a señala cu loke nan kier ta pa haya claridad riba e tema aki pa motibo cu na januari ministernan di Husticia semper ta bin hunto pa delibera riba temanan di interes mutuo a base di igualdad y Aruba mester di un claridad un rato pa sa si esaki ta e ambiente cu ta reinando na Hulanda.

Minister mes a sigura cu den statuut e temanan kico ta di reino y kico no ta di Reino ta delinea y den e caso aki e parlamentario di Tweede Kamer no por dicidi pa Aruba riba e tema aki, ‘p’esey nos pidi un aclaracion di Hulanda riba esaki, pasobra e ta daña e bon relacion y cooperacion cu nos tin cu nan riba diferente tema y nos no kier cu e relacion a wordo stroba’, Minister Bikker a manifesta.

Di loke ta referi pa e proceso pa cu mantencion suspendi di compleho di Corte di Husticia por a cuminsa, Bikker a splica cu desde 2014 compleho corte comun di Husticia ta wardando riba Gobierno riba un contesta pa bay over riba e mantencion di edificio di compleho di Corte, esey ta edificio monumental.

Tocante esaki, el a sigura cu nan a haci un inventarisacion y nan a haya dos concepto di contract cu pa añanan caba e corte comun a pidi pa wordo formalisa y nan no a haya atencion riba esaki, tambe a confirma cu nan a revisa y ahusta e contract aki pa wak kico mester na base di diferente departamento di Gobierno y conhuntamente cu Minister di Finansa y Minister di Infrastructura nan a formalisa e contract ey pa finalmente inicia e proceso pa un destaho publico pa esaki lo wordo inicia.

“Nos ta hopi contento pa e compleho cu ta un monumento a haya su debido atencion”, el a finalisa.