Ayera mainta minister di Husticia, Siguridad y Integracion mr. Andin Bikker, a ofrece un conferencia di prensa pa medionan local y a duna un splicacion di e maneho nobo cu a anuncia diaranson ultimo den rueda di prensa di Departamento di Integracion, Maneho y Admision di Stranhero (DIMAS).

Pa cu esaki, minister Bikker a menciona cu desde 13 di maart e aña aki Aruba y henter mundo a keda confronta cu e pandemia di Covid-19, cu a afecta economia di nos isla grandemente. Economia ta depende mayormente di turismo y esaki y otro sectornan dependiente a haya golpi duro. Esaki a crea tambe un situacion dificil pa hopi empleado, tanto local como di exterior.

Den e situacion aki gobierno mester a sostene companianan caminda cu tin diferente persona cu aworaki ta cobra un fraccion di loke tabata cobra pa luna y cu tambe algun compania mester a ahusta nan gastonan y otronan cu lamentablemente a cera nan porta. Esaki a causa un desempleo desproporciona den tanto empleado local y tambe esunnan di exterior, ya cu mercado laboral ta depende grandemente di labor importa. Gobierno mester evalua esey y analisa den cual direccion ta bay. Pa esaki a crea un comision cu den ultimo lunanan aki a haci un analisis profundo di mercado laboral. “Esaki ta un maneho coherente pa sa unda bo ta y na unda bo kier bay,” minister Bikker a sigura. Ta bin un maneho unda ta duna prioridad na e gruponan cu no mester di permiso, aunke semper lo keda un grupo di exterior necesario pasobra esey ta loke mercado ta pidi. Pa aña normalmente ta atende un cantidad di entre 15.000 pa 16.000 peticion di permiso di estadia.

Un di e aspectonan cu nan a ripara ta cu hopi persona a expresa e deseo di bay back nan pais di origen, pa cual segun el a señala, a introduci e programa di “Regreso Voluntario” y cu e siman aki specificamente lo tin e di cinco vuelo pa e pais bisiña Venezuela, pero tambe pa otro persona di otro pais rond mundo.

E comision aki tambe a cuminsa concentra riba mercadonan nobo di cual a anuncia “Digital Nomad” cu ta trata di un grupo di persona cu ta traha via nan computer y cu no mester di un oficina. “Esaki ta un segmento di mercado hopi importante cu diferente pais ta concentrando ariba,” Bikker a anuncia.

Tambe el a menciona e idea di “Workcations” pa personanan cu ta bin un of dos luna pa por traha for di Aruba y cu nan tambe ta dunando un ‘Bonbini’ na e segmento aki.

Di loke a anuncia caba di e maneho nobo, a dicidi cu lo nenga e prome permiso, pero segun Bikker, tin tres pagina di profesion pa cual tin un excepcion. “Nos ta consciente cu tin profesion cu aki na Aruba nos tin mester di nan y seguramente nos lo tuma na cuenta”.

Di tur e maneho Bikker a expresa cu nan a bin cu dos aspecto cu ta hopi importante; un di nan ta loke nan ta yama un “Clausula di excepcion” cu ta trata di introduci un maneho a base di un situacion sin precedente manera e pandemia, y ora e circunstancianan cambia por evalua e maneho un biaha mas.

Esaki tambe ta duna cu si tin grupo di caso cu no a tene cuenta cu nan, e ora ey por haci un excepcion pa nan; ta keda evalua e maneho pa wak si ta actualisa, si tin algun efecto cu por ta menos positivo y por ahust’e. “Na final di dia loke bo kier yega na dje ta un balansa entre mercado laboral y e persona cu ta admiti of ta prolonga nan permiso,” Bikker a señala.

Tambe el a duna di conoce cu ayera atardi e tabatin un reunion cu representantenan di AHATA, Aruba Restaurant Association, y mediador di gobierno pa loke ta trata asunto laboral pa nan por papia di e topiconan aki. Minister di Asunto laboral tambe ta keda pendiente pa loke ta trata mercado di labor, segun el a bisa.