Minister Andin Bikker: ‘Por bisa cu 97 porciento di peticion di asilo ta indebido’

E situacion di Venezuela ta demanda atencion di gobierno di Aruba, segun Minister Andin Bikker (POR). Pa es motibo a tuma e decision pa cambia ley pa e sistema moderno di aplicacion di asilo.

Segun e mandatario, tur otro pais cerca di Venezuela ta pasando den e mesun reto. Sinembargo, na Aruba a yega cu sistema nobo, cu analisis di 97% persona cu ta drenta pa pidi asilo no ta cay den remarca pa esaki, pues ‘nan no ta refugiado bou tratado’.

E mayor porcentahe , segun e analisis, ta persona cu ta buscando un miho economia, pero no ta core peliger na nan pais of ta persigui politicamente. Pa e maneho di 2018 a logra manda bek e fluho di persona.

Sinembargo, a cera e frontera na mei y lo sigui prolonga segun ta necesario. Pa cualkier persona cu nacionalidad Venezolano cu kier regresa nan pais, e mandatario a bisa cu tin 2 vuelo pa siman, cu ta basa riba decreto cu Venezolanonan cu a bin y nan mester bay por biaha via e vuelo ey, of nan por coy otro ruta, ‘e hecho cu frontera ta cera no ta un excuus’.

Tambe Bikker a expresa cu tin cu atende cu diferente persona cu tin reto di salud. “Nan ta keda ser humano y nos como pais tin obligacion. Tin diferente organisacion cu ta yuda nos cu esaki.”

E concepto di decreto di Raad van Advies ta e permiso ESTA prome cu bay biaha. Tambe tin APIS, cu ta ‘Advance Passenger Information System’, e sistema cu lo sa na ken a bende un ticket di vuelo. Si e persona cu e ticket no ta bon bini, esey ta nifica cu e persona no ta subi riba e avion pa yega Aruba.

Tambe tin aplicacion di reforsa e ‘schipholmodel’, caminda ora persona cu yega y ta pidi asilo, tin cu warda 28 dia durante cual ta haci un screening pa mira si e persona tin derecho pa haya asilo. Nan ta verifica e screening den area di salud, mirando cu Venezuela su estado ta sumamente preocupante y tin diferente brote di malesa.

Den e proceso, tin unidad di asilo, unda cu Hulanda a manda un team pa train 10 persona pa haci analisis pa aplica pa asilo. Nan ta haci un fast check pa wak si e storia ta cuadra y ta bin cu decision.

Bikker a menciona caso di persona cu ta yega Aruba cu lancha y ta haci peticion di asilo. E mandatario a bisa cu ta respeta e proceso di aplicacion pa asilo, sinembargo, Hues a nota cu e persona en cuestion no tabata bin na remarca pa asilo. “Por bisa cu 97% di peticion di asilo ta indebido”, e mandatario a finalisa.