Durante un conferencia di prensa cu Minister di Husticia, Andin Bikker a ofrece ayera, el a papia tocante varios topico, manera e decreto pa maneho estricto nobo di peticion di asilo politico, cu a drenta na vigor ayera; y e presentacion di ley pa introduci Advance Passenger Information System, Passenger Name Record y visa ESTA.
Tocante e maneho nobo di peticion di asilo politico, Bikker a anuncia cu ora nan a drenta den gobierno, nan a haya e articulo 19 di toelastingsbesluit cu tabata skirbi na aña 2008, y e tempo ey tabata haya di un pa dos peticion di asilo politico pa aña.
Bikker a comenta cu desde mei 2018, nan a constata e cantidad di 1.400 peticion di asilo politico y cu na e momentonan aki nan a ripara cu 97% di e peticion ey ta haci uzo indebido y no ta cay bou di tratado. Asina tambe e personanan tabata haci uzo di e articulo 19 cu ta bisa ‘ora un persona ta yega na frontera di un pais por pidi asilo’ pero aworaki esey a keda reemplasa.
Di mesun manera, Bikker a bisa cu hende tabata bin como turista, extende nan estadia turistico, despues di esey nan tabata disparce den ilegalidad y den e ora cu nan ser haya pa Warda Costa nan tabata pidi asilo politico.
El a informa cu desde ayera nan a cambia e decreto tocante e articulo 19 di un manera stricto, manera ta aplica na Hulanda y na Europa, caminda cu el a bira articulo 19A, cu tin diferente salvaguardia pa protege e pais y e mercado laboral di e personanan cu ta bin haci uzo indebido di aplicacion di asilo.
Por ehempel, Bikker a comenta cu nan a haya personanan cu a deporta, y despues e mesun persona a presenta na frontera y a bisa cu ta bin pa pidi asilo. Tambe algun personanan cu ta yega Colombia of Panama, ta keda un par di dia eynan y despues nan ta bin Aruba y pidi asilo. Den e procedura nobo, si e persona ta yega na un luga caminda cu e persona por pidi asilo caba, ‘no tin sentido cu bo ta bay den transito core bin Aruba, bo por pidi na Colombia of Panama’, Bikker a sigura.
Tambe, el a manifesta cu a introduci e Schiphol Model a base di ley, cual ta regarda e periodo ora un persona yega pidi asilo, gobierno tin derecho di retene e persona te cu 28 dia, den cual den e prome siman lo evalua si nan peticion tin merito.
Di otro banda, Bikker a informa cu nan a manda pa Raad van Advies un ley pa introduci e Advance Passenger Information System, Passenger Name Record, cu ta trata cu ora un persona ta cumpra un pasashi y tin intencion di biaha pa Aruba, a base di e sistema aki tres dia prome nan lo haya e lista di e pasaheronan cu tin intencion di bin Aruba, pa check si a yega di deporta e persona en cuestion caba, si tin antecedente penal, of si tin otro intencion cu no ta turista. Asina por tuma e decision di anuncia pa e linea aereo cu e persona ey no tin mag di subi avion.
Pa loke ta trata ESTA, Bikker a splica cu ta un sistema di ESTA Mericano, cu nan mester crea e base huridico den ley, cu e prome paso tabata e cambio di Ley di Admision y Expulsion, cu nan a haci na december di 2018 y aworaki nan ta bay cambia e decreto LB HAM (Landsbesluit Houdende Algemene Maatregelen), cu desde awe cu aprobacion di Conseho di Minister ta bayendo pa Raad van Advies pa por decreta y sistemanan ey lo drenta den vigor.
