Minister Andin Bikker: ‘Castigo adicional pa presonan cu ta huy of persona cu ta yuda otro huy’

Durante un conferencia di prensa a anuncia cu kier cambio mas pronto posibel den infrastructura y mantencion di KIA, tambe e ubicacion di e facilidad nobo. Cambio den ley di aumento di castigo pa persona cu huy of esunnan cu ta yuda nan, y proceso pa banchi electronico pa esunnan cera den prizon.

Den ora di madruga a ricibi e noticia cu dos hoben a huy for di KIA. Minister Andin Bikker (POR) a bisa cu a reuni cu e diferente departamento di KIA, CEA, siguridad nacional KPA y Ministerio Publico.

Investigacion ta andando, sinembargo e mandatario a bisa cu e rason principal ta keda e deterioro di infrastructura cu a hereda. “Pa e ultimo 8 aña, tin e reto di mantencion. Mayoria di biaha a pone fondo, pero no riba caminda cu mester a bay trata cu e mantencion y construccion di prizon nobo.”

Segun e mandatario, a aplica e Request Of Interest pa un institucion nobo. E facilidad ta den mal estado pa decadanan caba, unda tin varios factor, manera lama, cu ta afecta e infrastructura.

Pa locual ta trata e situacion cu ya caba tin 4 persona a huy for di KIA, Bikker a expresa cu tin varios intento, y esunnan cu ta logra ta haya yudansa di famia cu ta conspira cu e persona, dunando nan shelter.

Den articulo 2146 di codigo penal ta bisa cu si un persona yuda un esun den prizon pa huy, e ta haya castigo di 4 aña. Bikker a laga sa cu lo tin un proceso nobo, den cual ‘lo cambia articulo den dos forma’.

E 4 aña di castigo cu e persona lo haya, lo bira 8 aña, pa asina laga cla cu no ta tolera acto asina den comunidad, segun Bikker. “Un persona cu ta den prizon ta pasobra algo serio el a haci y mester proteha comunidad.”

E di dos forma cu lo cambia ta den sistema huridico di Hulanda. E persona cu ta huy ta haya castigo disciplinario y no ta bin na remarca pa libertad condicional, ‘e tin cu sinta su castigo completo’. Cu esey ta bay introduci tambe cu ademas di e mesun castigo cu nan tin cu cumpli, lo bin castigo adicional den su sentencia, ‘pa nan realisa cu nan ta recluso’. Segun e mandatario, varios pais ta cambiando nan ley pa e forma aki.

Tambe lo cuminsa cu e proceso di busca informacion na compania cu ta duna servicio di ‘enkel bandje’, e banchi electronico cu ta pone na enkel di e presonan, pa un miho supervision.

Segun Bikker, lo pone esaki na esunnan cu tin comportacion cu lo kier huy for di prizon. “Si nan logra nan no por bay mucho leu, pasobra e banchi electronico ta bisa unda nan ta.” Sinembargo el a bisa cu tur esunnan cu a huy a ser haya bek of ta wardando ‘pa haya esakinan’.

E facilidad cu lo construi nobo lo tin un ubicacion unda e lo ta mas central. Pa motibo cu esey tambe ta falta di personal pa yega nan trabou te na KIA. Lo atende cu e seriedad di falta di mantencion di e facilidad. Di e forma ey lo reduci caso di escape.

Pues lo bin cu ‘mantencion necesario di e facilidad, drecha infrastructura, contrata mas personal y cooperacion pa cambia e ley’, Bikker a finalisa bisa.