Minister Alex Schwengle: Algun dokter a reacciona sorprendi di e carta cu nan a haya di investigacion

Desde aña pasa ministerio di Minister di Salubridad, Cuido di Hende Grandi y Deporte ta haciendo investigacion si tin dokternan cu ta haciendo trabou ilegal for di nan oranan di trabou of no ta tene nan mes na e restriccion di MB. Minister Alex Schwengle a bisa Bon Dia Aruba cu cartanan a bay caba na dokternan y algun dokter a reacciona sorprendi riba esaki.

Awor tin un ley nobo di inspeccion di cualidad cu ta biniendo y tambe tin Arubig, pero realmente nan no ta poni den funcion ainda. Esaki ta significa cu e ley bieu ainda ta aplicabel, unda cu ta bisa si un dokter ta bin di Hulanda via e “Nederlandse Acreditatie,” automaticamente e ta wordo inscribi na Aruba y e por eherce su ofishi. Pero si e dokter no tin esaki ta nifica cu e diploma ta bay wordo evalua, unda cu lo mira si e diploma ta existente, si e ta legal y alabes si e diploma ey ta duna bo e derecho pa eherce e ofishi cu e dokter ta bisa cu e por haci riba na e pais di origen di bo diploma.

Investigacion ta bay paso pa paso

Nan ta bay paso pa paso cu e investigacion, segun minister. Esaki ta pa motibo cu semper ta wordo bisa cu e ley Hulandes ta diferente cu esun di Merca, ya cu na Merca nan ta yega actua mientras cu na Hulanda mester avisa prome aunke cu nan ta mester sa. Un carta a wordo manda pa tur dokter di Aruba indicando cu tin MB. Den e carta nan ta manda recorda e dokternan cu e MB ta limite di e trabounan di e dokter, y si nan ta haci algo pafo di e MB esaki ta ilegal y e por tin consecuencia negativo. “Tur e cartanan a bay y tin algun cu a yama mi tambe den shock, spanta. Nos a haya algun keho specifico y awor cu e carta a bay, awor e tarea por bay pa inspeccion tambe pa bay haci un investigacion,” minister a bisa Bon Dia Aruba.

Departamento di inspeccion

El a indica cu no mester lubida cu e departamento di inspeccion no ta inspecciona full ainda manera e mester ainda, pasobra e ta hopi chikito. Esaki kiermen minister no por encarga e departamento cu cosnan. “Esaki ta importante pero lanta inspeccion ta hopi hopi importante tambe. Si mi mester tin prioridad, mi ta prefera pa nan traha mas tempo riba e ehecucion pa bin cu inspeccion nobo anto esaki ta un prioridad tambe pero e no ta na prome luga,” segun e mandatario. Poco poco nan lo bay cuminsa cu analisisnan. Ta importante pa pueblo yuda nan.

Keho
Segun minister, nan trabou ta depende di e kehonan cu ta drenta. Un biaha mas e ta referi cu e kehonan mester ta por escrito y por ehempel no via pueblo na palabra of media social. “Of si bo kier haci esey anonimo, por traha un cita, por bin y nos lo respeta esey tambe. Al menos nos por tende di ken bo ta papiando, di cua profesional, di cua caso, ki tempo y na unda. Pasobra e ora ey nos por bay mas specificamente, y wak kendenan ta trahando ilegal. Y kere mi e ora ey nos lo actua,” el a sigura Bon Dia Aruba.