Segun un carta adresa pa minister di Infrastructura Benny Sevinger, Roberto Rincón – e empresario deteni na Merca- lo haya un tereno di 3703 m2 na Balashi pa actividad comercial.
E carta ta mustra cu Rincón a entrega e peticion 29 di april 2014 y riba 5 mei 2014 minister Sevinger ya a acorda esaki, uzando e palabranan ‘dezerzijds akkoord. gaarne medewerking.’ Por lesa esaki riba e carta abou acompaña pa su firma.
E carta lo keda publica den e corant Solo di Pueblo di 13 di januari pero tambe a haya atencion awe den diferente programa na radio, lia na oposicion. Aki por lesa e carta cual parlamentario Dangui Oduber (MEP) a publica riba su Facebook. No tin confirmacion ainda di parti di Departamento di Infrastructura, ni di minister Sevinger.
Procedura extenso
Departamento di Infrastructura DIP tin un procedura extenso pa otorgamento di tereno comercial. Prome mester sigui e procedura di ‘optie’. Despues lo sigui un evaluacion di y control adminstrativo riba e peticion. A base di esaki lo tuma un decision y lo sigui un decreto ministerial. Despues e solicitante mester entrega mas rapport, cu entre otro lo mustra si e proyecto comercial ta factibel y riba impacto economico, social y pa medio ambiente.
Bon Dia kier sa awor den cua fase e peticion ta y si e aprobracion di minister ta trata di un aprobacion di un optie riba e tereno of di biaha pa duna Rincón e tereno. Tambe mester claridad riba con ta posibel cu minister por duna un aprobacion asina lihe? Sabiendo tambe cu e periodo di entregamento pa aprobacion tabata hopi cortico. Pasobra 1 di mei ta dia liber, 2 di mei gobierno tabatin su ATV obligatorio, y 3/4 mei tabata e dianan di weekend. Pues si bo ta exclui e dianan di entregamento di e peticion (29 di april) y aprobacion di minister (5 mei) tabatin solamente 1 dia (30 april) pa por haci e evaluacion.
