Diahuebs ultimo, Stichting Rancho a ofrece un conferencia di prensa pa medionan local, pa anuncia nan mini-conferencia ‘Ban Exporta’ cu lo tuma lugar awe mainta na Museo Arkeologico di Aruba, cu diferente topico interesante tocante exportacion.
Den cuadro di celebracion di 10 aña di Stichting Rancho, Clifford Rosa, presidente di e fundacion, a informa cu nan a cuminsa cu esaki diahuebs atardi cu un tour den e bario, conhuntamente cu lo cual Museo Arkeologico ta ofrece, cu ta e exposicion di ‘Caribbean Ties’. Segun Rosa a expresa, ta bon pa compronde cual ta e transaccionnan y e manera con productonan tabata move den Caribe.
Rosa a comenta cu, despues di 10 aña, nan ta orguyoso di por mira e desaroyo cu a tuma lugar y tambe lo cual nan kier logra ainda y sigui den e proceso aki, como desaroyo economico den Rancho, cu ta meta di e fundacion.
E mini-conferencia di awe mainta lo tin invitadonan cu lo trece informacion valioso den e parti educativo, sin laga afo e cooperacion internacional cu nan ta mantene como fundacion, expresa den e lasonan cu nan ta hayando cu diferente instancia y organisacion internacional.
‘Ban Exporta’ ta un conferencia pa trece diferente tematica dilanti como por ehempel, educacion di aviacion cual tin un importancia masha grandi pa e sistema di educacion. Jacinto Frans di Scol di Aviacion di Caribe na Boneiro lo presenta den e conferencia e proyecto “Comision Aereo”. Frans a informa cu e ta forma parti di un scol cu ta existi pa casi 12 aña y el a mira cu esaki ta un bon oportunidad pa e personanan cu tin interes di bay den importacion y exportacion.
Tambe Frans a sigura cu aviacion no tin di haci solamente cu piloto sino tambe cu e mecaniconan cu ta esunnan cu tin un rol importante. Y mirando e posicion geografico di e islanan y e historia cu tin den comunicacion cu Sur America, aviacion na e islanan ta un fuente hopi importante pa por haci negoshi.
Frans a splica cu mester di mecanico di avion, nan ta di acuerdo cu hende local mester por drecha avionnan local, pa motibo cu e ta sali mas economico. Su intencion ta cu siendo parti di Reino Hulandes, nan kier yuda pa mecanico di avion por tin mas seguridad economico na e islanan y den exterior.
El a trece dilanti como por ehempel, cu na e momentonan aki mester di 660.000 mecanico di avion na mundo; Hulanda cu 17 miyon habitante ta genera entre 18 pa 20 mecanico pa aña: den resumen, ni di aki pa 100 aña Hulanda so por genera tur mecanico cu mester y aki ta unda por yuda.
Di otro banda, Rosa a señala cu tambe lo mustra e pasonan cu a tuma den ultimo tempo pa asina por sigui recluta hobennan cu ta tuma e decision di bay den direccion di mundo aereo y mundo maritimo.
Lo ta bay tin informacion tocante e comision maritimo, y cu nan lo papia di tur e logronan cu nan a haya den e parti ey y mustrando tambe e oportunidad cu lo mester crea den e desaroyo di mundo maritimo.
Greg Peterson director di Free Zone Aruba lo anuncia pa comunidad e manera con pa haci exportacion como isla, of como persona cu kier haci negoshi y con esey por trece oportunidad.
Peterson a bisa cu nan lo kier duna informacion tocante e posibilidadnan pa usa e plataforma di Free Zone Aruba pa por expande negoshi den region. Banda di esey e compania tambe tin un incentivo special pa e mecaniconan. Si e tipo di negoshi ta trece avion pa Aruba pa haci mantencion, nan por usa e modelo di e compania di free zone pa haci esey.
Lay Hing de Kort-Yee di Cornerstone VBA lo ofrece un splicacion tocante exportacion via RVO un plataforma di Reino Hulandes cu ta duna oportunidad di por crea diferente scenario y diferente idea pa crea un producto y exporta esey tambe.
Lincoln D. Gomez cu ta un persona cu a lanta un compania nobo na Colombia na e momentonan aki y ta envolvi den exportacion for di Colombia pa Aruba, Corsou y Boneiro den medio di avion di carga, tambe lo ta presente.
Cu esaki, Rosa a afirma cu nan lo kier crea un pilar economico basa riba importancia di e parti aereo, e inversionnan hopi grandi cu ta tumando lugar na Aruba na aeropuerto como entrada. Tambe e educacion cu ta haci falta pa lo cual ta e parti aereo y esey lo mester crea oportunidad na Aruba y na otro islanan di Caribe. Di mesun manera, e parti maritimo y di pesca tambe mester di atencion y esey ta otro oportunidad cu nan ta creando actualmente.
