MinFinansa: Presupuesto 2019 ta cera cu entrada mas halto; A pesar cu gasto a subi entre otro pa reparatietoeslag

Diahuebs awor Minister di Finansa y Economia, Xiomara Ruiz-Maduro lo haci un presentacion den Parlamento riba comportacion di e di tres kwartaal di presupuesto 2019.

E biaha aki gobierno no lo bay bati porta di nos organo legislativo pa bin cu un presupuesto complementario. Sino cu e mandatario a laga sa cu e presupuesto aki a cumpli cabalmente cu loke a wordo stipula den dje.

El a bisa cu anticipando ariba e cambionan cu lo tin na fin di aña, pa locual ta e presupuesto di 2019, gobierno a produci un rapport anual of ‘najaars nota’ den cual nan ta indica unda pais Aruba ta para financieramente. Igualmente e ta considera importante pa divulga e informacion aki, mirando cu nos ta bou supervision financiero di CAft. “Nos tur sa kico ta vislumbrando…,” el a declara.

Situacion financiero.
E mandatario a divulga algun datonan di e rapport anual, unda el a haci un recapitulacion di e cifranan. El a bisa cu mita di aña 2019 ta mustra cu gobierno a sigui ahusta su mes na e apoderacion aki. Awor cu nos ta yegando fin di aña, e cifranan ta mustra cu e situacion ta lo siguiente: Gobierno su entrada ta mas halto. Nan a haya 14.28 miyon mas hopi. Pero si gobierno tin algun gasto cu a cay un tiki mas halto cu un 11.31 miyon. Pero den esaki 8.3 miyon ta e reparatietoeslag.

“Nan ta fondonan. No ta gastonan con cu ta. Ta gastonan necesario pa cu e pais akinan,” el a bisa. E gasto grandi ta pa e reparatietoeslag, cual decision di gobierno ta pa sigui brinda esaki na pueblo, el a bisa.

Banda di esaki, minister di Finanzas y Economia a informa cu gobierno ta cera no cu un gasto mas halto, sino cu un entrada mas halto. E ta un entrada di 2.9 miyon florin, pero e ta nifica un entrada mas halto.

E resultado final cu el a duna ta cu gobierno a keda den e presupuesto di e aña aki, y te hasta nan ta keda un tiki miho cu locual a presupuesta, el a bisa. Tambe el a indica cu e deficit cu nan a premira pa 2019 tabata di 25 miyon florin. Nan ta cerando na e momento aki cu un deficit di 20 miyon. “Es decir e buraco ta un tiki mas chikito,” el a bisa. Inicialmente -segun e norma y e protocol firma cu Hulanda- e porcentahe di e deficit presupuestario pa 2019 a premira pa ta na 0.5% di nos GDP y awor e ta na 0.325%, el a bisa.