Minister di Finanzas Ardwell Irion a bisa durante e briefing live riba conseho di minister diaranson ultimo cu comision di supervision CFT a confirma diamars ultimo cu Sint Maarten a cumpli cu e criterionan pa haya e ultimo prestamo liber di interes di NAf. 53 miyon otorga pa gobierno Hulandes den mei.
Irion a bisa cu CFT a duna su aprobacion via email diamars ultimo. El a indica alabes cu minister di Asuntonan Interno y Relacionnan di Reino Raymond Knops a wordo informa. Gobierno Hulandes a otorga un prestamo liber di interes di 53 miyon florin na Sint Maarten mei ultimo.
Mas o menos 24 miyon a wordo poni na disponibilidad inmediatio, mientras e otro 29 miyon florin tabata wanta pendiente Sint Maarten su cumplimento cu condicionnan. E condicionnan aki tabata inclui subi edad di pension di 62 pa 65 aña, cual parlamento a aproba, reduccion den pakete di condicion laboral di ambtenaar, y cambionan grandi den Sint Maarten Stimulus and Relief Plan (SSRP), esta e programa di subsidio di salario di e isla aki.
Varios di e condicionnna a wordo cumpli cune net na ultimo momento, prome cu e deadline di 15 di juli a pasa. E decreto ministerial reglando e cambionan den e subsidio di salario a wordo aproba siman pasa pa conseho di minister, mientras parlamento a pasa e ley pa hisa ley di pensioen riba e dia di e deadline.
E 29 miyon florin cu a resta lo ta destina primordialmente pa subsidio di salario. Asinaki Sint Maarten ta sigura cu por sigui paga e subsidionan den termino corto. Irion a bisa cu CFT a informa gobierno di Sint Maarten cu compania di accounting BDO lo bay audit e pais su uzo di e resto di e subsidio.
