Mothers In Need Aruba (MINA) ta un fundacion relativamente nobo cu tin como enfoke brinda ayudo na e mamanan soltero di Aruba. Mariana Aguilar, fundador y presidente di e fundacion, ta splica Bon Dia Aruba den un entrevista con e fundacion a lanta, e meta y e vision cu e fundacion tin.

E idea pa lanta MINA a bin durante e temporada di pandemia di COVID-19. Aguilar ta conta cu el a cuminsa wak ariba rednan social cu tabatin hopi mamanan cu a keda sin trabao of hopi di nan tabata busca manera con pa yega na productonan primordial, manera entre otro pampers, formula, cuminda, paña pa e muchanan. Di su mes, sin tin e fundacion ainda, el a cuminsa acerca diferente hende ariba Facebook y tabata ofrece pa su mes busca productonan y reparti esakinan na diferente mama.

Despues di mas o menos tres pa cuater luna, Aguilar hunto cu su ekipo a dicidi di habri e fundacion Mothers In Need Aruba y a base di esaki e idea a sigui y nan a sigui brinda ayudo na e mamanan den necesidad.

Pero lastimamente ora cu el a cuminsa cu MINA, Aguilar mes a haya COVID-19 y el a sali na estado tambe, y pa e motibonan aki e mester a stop cu e trabao pa casi shete luna. Na aña 2020 toch, conhuntamente cu diferente sponsor, el logra duna 150 mucha un back to school backpack cu e articulonan basico di scol.

El a sigui splica cu aña pasa ora cu tur cos a cuminsa trankilisa back y a cuminsa bay na normalidad, e tabatin for di e prome dia caba kico lo ta bay e plannan pa e aña ey. “Mi tabatin diferente proyecto cu mi kier a logra, pero manera mi a menciona mi a haya Covid y mi a sali na estado y mi no por a make it. Pero e ora nos a cuminsa e aña aki”, el a indica.

E prome proyecto cu MINA a realisa e aña aki tabata e segundo edicion di e Bushiri Karting Walk and Run and Kids Run di 2Fast4Usports riba 30 di april, unda un cantidad grandi di persona a participa. Ariba mesun dia, despues di e careda tabata e prome diaper drive di MINA unda conhuntamente cu comunidad di Aruba y diferente otro compania nan a logra un duna un total di 50 pa 60 pakete na e mamanan como regalo di Dia di Mama.

Otro proyectonan pa e aña aki ta inclui Back to School y un proyecto pa luna di december. Durante aña tambe lo tin eventonan pa educa e mamanan, lo tin tayernan pa yuda nan cu nan curriculum, con pa prepara pa un entrevista, entre otro, pa asina yuda nan reincorpora back dunando nan trabao of dunando nan e hermentnan necesario pa por sali pa dilanti.

“Mi sa cu pa hopi di nan ta dificil pasobra nan ta depende di bijstand y pa laga e bijstand y bay traha part-time ta dificil, pero e idea ta pa no solamente concentra na e muchanan cu ta primordial, pero tambe duna e mama e atencion cu e merece pa e bay back den comunidad y duna ehempel na su yiunan cu nan por sin importa kico ta pasa”, Aguilar a agrega.

Ayudo di companianan ta importante pa fundacionnan manera MINA, cu tin como meta yuda mamanan soltero. Aquilar a remarca cu na cuminsamento, ora cu MINA a haci e prome proyecto di Back to School, tabata dificil pa ricibi ayudo di companianan of sponsor pasobra hopi hende no tabata sa kico e fundacion ta, ni kico nan ta haci. Aguilar a acerca algun hende cu ta cerca di dje y asina el a haya ayudo pa e proyecto.

E aña aki, el a subraya, el a bay un tiki mas leu y a bati na tur porta cu e por a bati y mayoria di e companianan a participa den su proyecto. “E feedback tabata basta bon y basta lihe alabes y manera mi a splica nan hopi biaha, MINA ta apenas tumando baby steps. E no ta un fundacion grandi manera e otronan cu constantemente ta haya ayudo pasobra nan ta den spotlight”, el a agrega.

E vision y meta di MINA ta pa eventualmente yuda por lo menos 100 mama e aña aki, pero tur luna. No solamente ora cu tin donacion y bay reparti e donacionnan aki so y despues warda atrobe pa mas donacion drenta. Aguilar a enfatisa cu e kier pa e ta algo sostenibel tur luna pa e mamanan cu echt tin mester di dje.

E ayudo cu MINA ta brinda ta specificamente pa mamanan soltero. Aguilar a conta cu hopi biaha e ta haya mamanan cu ta bisa cu nan ta soltero pasobra e yiu no ta di nan pareha actual etc. Pero e kier enfoca y yuda e mamanan cu ta soltero pasobra tin di nan ta jong, hopi di nan ta indocumenta y nan tin mester di ayudo di berdad. Pero pa ricibi ayudo tin cierto rekisitonan cu ta aplica pa por tin un balans.

Pa loke ta e target group, MINA ta yuda tur e mamanan soltero, sin importa e edad y e ayudo cu nan ta brinda pa e muchanan ta pa muchanan entre 0 te cu 14 aña di edad.

A pesar cu MINA ta esforsa pa brinda ayudo na e mamanan den necesidad, esey no ta kita cu tin ocasionnan unda cu tin hende ta probecha di e ayudo den un forma no bon. Aguilar ta conta cu aña pasa nan a encontra un situacion unda cu nan a regala dos box na mamanan cu tabatin mester di dje y e mesun dia nan a wak e boxnan tabata wordo bendi riba Vraag en Aanbod pa casi 400 florin.

“Pa esey stop y pa hende no abusa di e confiansa, nos ta huur e boxnan. Esaki kiermen cu e persona ta haya e box un aña maximo y despues nos mes ta pasa busk’e y asina, den un manera di bisa, nos ta recicla pa duna otro mama”, el a splica.

Esaki tambe ta un manera cu e fundacion por haci un impacto den medio ambiente, pasobra tur locual cu nan busca ta cosnan usa di un manera of otro, y nan no ta cumpra cos nobo. Ora cu ta trata di por ehempel box pa baby, loke nan tin ta wordo usa den un manera positivo pa yuda otro hende te ora cu e gasta.

Aguilar a conta cu e fundacion MINA a participa tambe den Ronde van de Aruba unda cu e fundacion tabatin dos team cu a representa nan. Un di nan tabata e team di mucha muhe di e grupo Dynamite cu a sali ganador y cu a kibra record despues di 11 aña, y tabatin otro team di e miembronan mes di e fundacion. Esaki, Aguilar a remarca, ta cu e meta pa MINA wordo reconoci den comunidad.

Por ultimo Aguilar a menciona pa personanan cu ta interesa pa haci donacion di productonan di baby, paña di mucha y productonan pa scol por haci esaki libremente. Specialmente productonan di scol mirando aworaki e muchanan ta bayendo den vakantie grandi y hopi hende ta ruim op tur cos. “Esey ta e parti cu nos kier touch. Si un persona ta bezig ta recoge uniform, tasnan di scol, material di scol, kico cu a resta, nan por haci donacion di esaki cerca nos y nos por duna esaki back na e muchanan na augustus ora scol ta bay cuminsa back”.

Pa informacion, pa haci cualkier donacion of si ta interesa pa ricibi ayudo di MINA por tuma contacto cu e fundacion via nan rednan social of na telefon 738-3333.