‘MiMami’ un grupo dedica pa duna apoyo y sosten na mamanan riba red social

MiMami ta un grupo basa riba e red social Facebook cu alrededor di 4.000 siguido specialmente mamanan. Rachel Murray ta e persona cu a crea e pagina di Facebook aki cu meta pa duna consehonan na hende muhe cu diaramente ta biba diferente experiencianan cu nan yiu y asina por educa y duna ayudo na otro. Sra. Murray a splica cu e grupo a cuminsa un aña pasa na augustus di 2018.

Durante un entrevista cu Bon Dia Aruba a tene cu Rachel Murray, el a papia riba ‘Unfiltered’ cu ta un evento cu a ser haci recien, ora tabatin diferente discusion entre mamanan, nan preocupacionnan y ademas nan a papia riba dos topico di cual tabata ‘Abuso sexual di mucha y e caso di un mama cu a perde su yiu’.

Sra. Murray a bisa cu e experiencia di e charla tabata hopi sentimental pa motibo cu e dos topico ta causa hopi impacto, pero na diferente nivel, tabatin mama cu a perde nan yiu durante embaraso, otro cu a perde den parto y otro cu a perde añanan despues, pero e dolor ta keda mescos. Sra. Murray a bisa cu tabata den atmosfera hunto cu e topico di abuso di mucha cu a causa hopi frustracion dicon e cosnan asina ta pasa.

Di mesun manera el a comenta cu Janine Rodriguez cu ta traha na departamento di Asistencia di Victima na warda di polis tabata e moderador di e topico ey, pa asina splica con por preveni e abuso sexual di mucha y pa por reporta casonan asina.

Tocante su opinion riba e problema aki, sra. Murray a sigura cu esaki ta cay riba mayornan pa motibo cu nan ta wardado di nan yiunan te cu e no ta un mucha mas, nan tin cu proteha e mucha y mira bon ken nan ta confia. Tambe el a señala cu e mayornan tambe mester educa nan yiunan, enfoca semper con e muchanan por bisa algo cu no ta bon.

Di loke ta trata e manifestacionnan cu a wordo haci, sra. Murray a manifesta cu semper ta existi un grupo di hende cu ta mas activo cu otro, pero manera el a agrega “mi ta kere cu tur dos banda ta trece balor pa e situacion, e manifestacion ta un parti importante pa tur hende a wordo scucha”.

Pa finalisa, el a informa cu su grupo MiMami tin planea pa haci mas evento ‘Unfiltered’ tocante otro topiconan dirigi pa mamanan y asina duna sosten na nan mes, pero e no a bisa un fecha.