Mediante un comunicado di prensa cu e fundacion aki a manda na diferente medionan di comunicacion social, a señala cu debi na e decision di Gobierno di Aruba di bay casacion contra e veredicto di HOF di matrimonio di mesun sexo, di esaki e presidente di fundacion tambe a trece su puntonan dilanti.

Den e comunicado nan ta amplia cu na juli di aña 2016, fundacion a manda un mensahe indicando cu lo ataca tur instancia na Aruba cu ta discrimina contra derechonan humano LGBTI y lo denuncia e apelacion anuncia pa Gobierno di Aruba den casacion cu segun a sigura, ta bou presion di misanan evangelico.

Den e comunicado di dia 24 di februari nan ta bisa “cu asombro y asco nos a tuma nota di e decision di Gobierno di Aruba pa bay  den apelacion contra e veredicto recien cu ta bisa cu nenga di introduci  matrimonio di mesun sexo ta viola tratadonan internacional cu ta prohibi  discriminacion contra di e comunidad LGBTQI.”

Igualmente nan a informa cu nan “ta compilando datonan riba tur misa evangelico pa kehonan penal y ta alabes  spierta Gobierno cu ora Gobierno y Parlamento di Aruba doblega pa presion di  algun misa evangelico, nan tin cu compronde cu nan no por conta mas confiansa di e pueblo cu estado y iglesia ta separa y nos constitucion ta guia maneho  politico y consecuentemente tin cu saca nan conclusion y disolve gobierno”.

Milton Ponson, ken ta fungi como presidente di e fundacion, a splica mediante un declaracion na Bon Dia Aruba cu na 2016 Codigo Civil di Aruba a conoce centenares di cambio, un di e cambionan cu a wordo haci ta e amienda na unda ta haci posibel pa por registra na Censo un partner di matrimonionan di mesun sexo di otro parti di Reino, specificamente di Hulanda y di e islanan Boneiro y Sint Eustatius y Saba.

“Den e tempo ey e misanan evangelico tabata ataca y nan tabata pone propaganda tur dia den corant, pa bati riba e drum di moralidad bisando cu e cos aki no por, pero na e tempo ey nan tabatin sikiera e decencia di ora nan a pone avisonan paga, na final bo tabata haya full e lista di e misanan supuestamente uni bao e plataforma of e nomber Misanan Evangelico Uni, specificando cada un di nan cu nan adres y e pastoor encarga cu e misa, esaki no ta e caso awendia y fuera di esey, entrante 1 januari 2022 nos Codigo Civil a conoce algun cambionan adicional na unda door entidad legal, asociacion legal, fundacion, entidad, N.V, asociacionnan cooperativo pa spaar placa a haya un lista adicional di exigencianan y obligacionnan pa ley pa cumpli cu nan e codigo civil aki yama burgerlijk wetboek rechtspersonen rechts, derecho di entidadnan legal y gobierno den e memorie van toelichting nan ta splica cu contrario na Hulanda y siguiendo e mal ehemplo di Corsou, a opta pa entidadnan legal di sector publico y misanan no tin cu wordo someti na tur e reglanan di e codigo civil aki cu ta regarda entidadnan legal,” Ponson a bisa.

Tambe e ta considera cu si ta tuma den consideracion cu aña pasa reglanan nobo a drenta na vigor pa combati labamento di placa y financiamento di terorismo na unda cu Aruba tin cu cumpli esakinan “basicamente e iglesianan aki y iglesianan evangelico den cual den pasado a wordo constata cu un cantidad di nan tabata laba placa, ta trafica droga, y ta haci actividadnan na unda no ta duna cuenta for di nan entrada riba kico e placa ta wordo gasta, mas importante hopi di nan tabata ricibi placa di afo e cual den tempo di campaña tabata wordo usa pa facilita partidonan politico cierto servicionan, manera busnan tabata recoge ariba dia di eleccion, busnan di misanan evangelico tabata recoge hende cu no tabatin manera di bay urna electoral, e pregunta ta si nos wak e dos ultimo huramento di dos gabinete ultimo y tambe den tempo di Mike Eman, bo ta wak e gabinete nobo recien huramenta para dilanti oficina di gobierno, rondona door di un cordon di pastoor di misanan evangelico, pues aki na Aruba corectamente misanan evangelico ta para pafo di ley y tin cojones di dicta moralidad y bisa cu nan no ta tolera un otro moralidad sino esun di nan mes.”

Ponson tambe a bisa cu e ta wordo ataca como activista di derecho humano reconoci na Nacionnan Uni cu den pasado su persona a haci hopi trabou y desde 2012 e ta haciendo trabou riba tereno di derechonan di LGBTIQ y hunto cu otro persona di Homo Lesbische Federatie Nederland, na 2005 a duna un keho contra dos minister y un abogado di pais Aruba “pa haci mencion den documentonan suministra na Corte comparando e matrimonio di mesun sexo cu un matrimonio entre un ser humano y un animal of pio, reduciendo esakinan na relacionnan pedofil unda abuso sexual ta tuma luga,” el a comenta.

Den su opinion ta importante pa ora misanan evangelico ta resalta cu nan ta bay husga un activista di derecho humano cu den comunicado a bisa cu lo ataca tur hende cu no ta respeta derechonan humano LGBTIQ “mi ta wordo ataca pa e punto specifico cu mi ta defende derechonan humano, nos na Aruba awe a yega na un nivel hopi abou na unda abiertamente activistanan ta wordo ataca pasobra nan ta defende activamente derechonan reconoci ya caba door di Nacionnan Uni y Vaticano cu ta representa e denominacion mas grandi cristian na mundo, cu un poco misa evangelico cu pa ley ta bagabundonan, bo por cualifica nan basicamente como bandido pasobra pa nan ley no ta conta, manera pa otro hende, ta bin bisa basicamente cu nan moral so ta manda y ultimo biaha cu ma wak nos constitucion den articulo 1 ta hustamente prohibi esey, pero e ta bay mas leu, entrante awe mi por duna tur misa evangelico aki na Aruba e cualificacion di e talibannan di Aruba,” el a finalisa.