Milton Ponson di Rainbow Warriors Core Foundation mediante un publicacion riba su rednan social a trece dilanti cu Aruba “definitivamente no ta bay cumpli cu obhetivonan di Desaroyo Sostenibel pa 2030” mirando cu Gobierno di Aruba ta bin firmando contractnan cu companianan grandi di petrolero y di gas.

“Ta parce cu no tin fin pa e fabula di mundo di fantasia cu Gobierno di Aruba ta haciendo pa convence pueblo di Aruba cu nan ta haciendo un trabou fantastico, prome tabata Eagle LNG partners y e perspectiva di dispone gas natural barato como combustibel pa e motornan di dual fuel di Wärtsila na WEB Aruba N.V, despues a bin e anuncio di firma di contractnan cu compania energetico Spaño Acciona Energia pa crea Hydrogen Valley Aruba y awor e MoU firma cu Armstrong Oil and Gas pa haci boramento exploratorio di petroleo y gas den Zona Economico Exclusivo di Aruba. Ta parce cu Repsol, cu anteriormente a bora na dos luga y cu ta socio strategico di Armstrong den proyectonan di Alaska North Slope y Pikka Oil Field, “came back in through the revolving door” y aunke nos prome minister a tene un sesion fotografico cu secretario general di Nacionnan Uni Antonio Guterres, prome minister Mark Rutte y prome minister di St. Maarten na e cumbre di SDG’s na New York, afirmando cu Aruba ta haciendo un excelente trabou pa e transicion di laga atras e combustibel fossiel y e lucha contra cambio climatico, tur e contract ta mustra cu Gobierno di Aruba y lamentablemente su pueblo tambe ta bay na banda di e companianan grandi petrolero y di gas durante e proximo 20 aña. Asina cu definitivamente, nos lo no cumpli cu e obhetivonan di Desaroyo Sostenibel pa 2030,” esey tabata parti di e declaracion di Ponson.

Dialuna ultimo minister di Energia, Labor y Integracion Glenbert Croes a informa comunidad tocante e firma di un Memorandum of Understanding (MoU) cu e compania Armstrong International pa evalua potencial di gas y petroleo den area maritimo di Aruba unda ta bay haci un estudio prome evaluando e datonan geologico y geofisico disponibel.

Tabata 6 di januari di aña 2020 dia cu a anuncia cu Repsol no ta sigui cu exploracion pa petroleo of gas den subsuelo di lama rond di Aruba, den un comunicado di prensa a informa cu Repsol a dicidi pa no drenta e siguiente fase (4) di e contracto cu e tin cu Compania Arubano di Petroleo (CAP). E contracto firma pa ambos partido na december 2012 a yega su fin 30 november di 2019, despues di un periodo di 7 aña.

“E rason principal pa no continua cu e campaña di exploracion ta e resultadonan di e proefboring, Bon Bini-1X, panort di Aruba, cu a resulta den un “dryhole”. Despues di a haci un analisis di tur e informacion obteni di Bon Bini-1X, a corela esaki hunto cu e datonan sismico cu a adkiri na 2014 y 2015. Door di e corelacion aki por a reevalua e prospectonan bieu y kisas haya prospecto nobo den e awanan teritorial di Aruba. Despues di e reevaluacion aki REPSOL y e hecho cu no a logra haya otro partner pa e proyecto di exploracion cu ta hopi costoso, a dicidi pa no sigui explora.” E comunicado tabata bisa.

“No tin nada pa celebra”

Ponson tambe a sigura y tur hende por a mira cu banderanan di SDG’s a ser hisa na diferente departamentonan y organisacionnan pa asina celebra e di ocho aniversario di Obhetivonan di Desaroyo Sostenibel y tambe pa recorda e trabou cu mester continua pa por cumpli cu nan y cu ta keda 7 aña so pa haci tur esey.

Den esaki, Ponson a trece dilanti cu na Aruba no tin nada di celebra “pa motibo cu den e obhetivo 1 tin ‘fin di pobresa’ y den obhetivo 2 tin ‘cero hamber’ y nan ta papia pa nan mes, obhetivo 3 ‘bon salud y bienestar’ nos ta leu di esey, Aruba ta exhibi record di obesidad, diabetes tipo 2 y Alzheimer. Obhetivo 4 ‘educacion di calidad’ efectivamente no, obhetivo 6 ta papia di awa limpi y saneamento, tur hende por wak e situacion cu tin di awanan di pos den high rise, obhetivo 8 ta ‘trabou decente y crecemento economico’ sin cu impuesto por afecta e poder di adkisicion, obhetivo 12 ‘produccion y consumo responsabel, definitivamente no. Nos tin un problema di gestion di desperdicio. Y di ultimo pero no menos importante, obhetivo 16 “paz, husticia y institucionnan solido’ esaki realmente ta hole stinki cu corupcion, preferencia politico y falta total di transparencia, ningun participacion real y pleno di e partinan interesa den e tuma di decisionnan pa desaroyo sostenibel y un parlamento cu ta refleha e The Muppet Show den mas di un sentido, asina cu mi ta kere un biaha mas cu celebracion no tin.”

Ponson, ken ta un ambientalista for di 33 aña pasa ta cuestiona cu “actualmente na Aruba e grupo di activistanan ta gruponan egoista cu ta busca di ta e centro di atencion y saca potretnan, cu den futuro nan ta bay bende nan alma pa “greenwashing practices” a cambio di hopi influencia y placa den nan account di NGO.”

Igualmente ta sigura cu e gruponan aki a yuda pa haya un retroceso den e tempo cu trinta aña pasa “y e pio parti ta cu nan ta facilita e participacion selectivo den tuma di decisionnan pa desaroyo sostenibel, nan ta yuda Gobierno di Aruba pa trata solamente cu ‘activistanan cu a proclama nan mes y expertonan ambiental preferi’ pa boicotia e participacion di NGO’s independiente.”

Den su opinion como activista ambiental, e ta considera cu ta dificil pa limpia e ‘desaster aki’ mirando e principionan generalmente acepta pa activismo den derechonan humano y desaroyo sustentabel. “Den proximo lunanan hopi di nan y NGO’s na Aruba ta bay keda exponi y ta e mesun Nacionnan Uni cu a haci e caminda pa e proceso di tuma di decisionnan y politica basa den evidencia pa sigura cu lo haci di manera igual cu participacion habri y inclusion di tur e parti interesa den e tuma di decisionnan pa desaroyo sostenibel, sin laga ni un hende atras.”

Pa Ponson “corupcion ta perseverando na Aruba y pa awor, ta necesario pa elimin’e di activismo ambiental.”