Recientemente Bon Dia Aruba a wordo invita pa forma parti di un conferencia na Merca Shared Ownership Investment Conference (SOIC) 2015 den cual un punto cu a haya hopi atencion ta e generacion di Millennials y nan habito.
E generacion di mas grandi den historia ta casi drenta su asina yama “prime spending years”, e añanan den cual nan ta gasta mas. Millennials tin un manera particular den cual nan ta reforma economia; nan experiencianan unico lo cambia e manera cu ta cumpra y bende cos, forsando companianan pa examina con nan ta haci negoshi pa e decadanan cu ta bin. Fuente Golman Sachs Global Investment Research.
Millennials ta tur hende cu a nace entre aña 1980 y 2000. Millennials a crece den un tempo cu hopi cambio lihe, dunando nan un cantidad di prioridad y expectativa hopi diferente na generacionnan anterior.
E generacion di Millennials ta esun di mas grandi den historia di US, ainda mas grandi cu Baby Boom. Segun datonan di US Census Bureau 2015 tin 92 miyon Millenials cu e mayoria ta den edad di 24 y 25 aña, Generation X tin 61 miyon cu e grupo mas grandi tin 50 aña. Y Baby Boomers cu e grupo di mas grandi ta di esunnan cu tin 51 aña.
Cas
Segun cu Millennials ta drenta e añanan di cumpra cas (25 – 45), nan gana di no kier drenta den e mercado di cas por cambia. E tamaño di e grupo plus e deseo di e grupo pa “settle down” den futuro, por causa un impacto di aumento di benta di cas abrupto. Mientrastanto un cantidad creciente di Millennials ta prefera keda biba na cas cu nan mayornan. Na 1990 e cantidad tabata 26.8% y 2010 29.9%. Expertonan ta bisa cu nan ta na cas den neishi awo, wardando pa bula. 93% di esunnan entre 18 – 24 aña ta bisa cu nan kier tin nan mesun cas den futuro. Edad 35 – 44 ta 75%, edad 45 – 54 ta 72%, y tur esunnan riba 54 39% ta bisa cu nan lo kier un cas di nan mes den futuro.
Yiu y casamento
Pa loke ta e categoria di amor y casamento Millennials ta wardando cu casamento y trahamento di yiu, Pero esaki no kiermen cu nan lo kier ta soltero pa semper. Na 2010 e edad averahe di casamento tabata 30 aña y na 1970 e edad tabata 23 aña. E total di hende hoben cu ta bira riba nan mes y casa a baha cu mas di 50% desde aña 1960, expertonan a analisa e porcentahe entre edad di 18 y 31 pa e situacion aki. 23% ta casa y bibando riba su mes na 2012, 27% na 2007, 43% na 1981 y 56% na 1968. Banda di esaki manera menciona anterior, Millennials ta wardando pa traha yiu tambe. A pesar di tur estadistica cu ta mustra cu nan ta tarda mas cu generacionnan anterior, 70% a bisa cu nan kier casa y 74% a bisa cu nan kier yiu.
Acceso y huur no bira doño
No ta den solamente cas, Millennials ta man duro pa cumpra auto, musica y articulonan luhoso. En bes di esaki nan ta haci uzo di otro servicionan cu ta provee nan cu acceso na e productonan cu nan mester, sin tin e peso/responsabilidad di ta doño di dje. Cu esakinan ta aumenta e asina yama “sharing economy”, economia di comparti. Economista Jeremy Rifkin ta bisa: “25 aña for di awo, prestamento di auto lo ta normal y pa ta doño di auto lo ta abnormal.” Hecho ta cu articulonan di necesidad pa generacionnan anterior, no ta mes importante pa Millennials. Na 2005 52% di Millennials tabata prefera huur un articulo y na 2013 e tabata 60%, edad investiga ta entre 24 te cu 34 aña.
Marca y benta
E afinidad cu Millennials tin na tecnologia ta re formando benta. Cu informacion di producto, “reviews” y comparacion di prijs den nan man, Millennnials ta buscando marcanan cu ta cumbini nan mas y na e costo di mas abou. 57% di Millennials ta haci comparacion di prijs prome cu nan cumpra. Ora cu ta haci promocion pa un producto, un marca fuerte no ta suficiente pa garantisa benta. Calidad ta keda importante,pero e prijs ta mas importante. Tambe locual ta resalta, e generacion cu ta biba online ta cumpra online. Pues ora cu un marca haci uzo di medionan social, Millennials ta gusta e marca mucho mas.
Bienestar y salud
Pa Millennials bienestar ta algo cu nan ta persigui diariamente. Nan ta haciendo mas ehercicio, come mas sabi y humando menos cu generacionnan anterior. Nan ta uzando aplicacionnan pa registra data di nan cantidad di ehercicio y informacion online pa haya sa cua ta e cumindanan mas saludabel. Cual por cierto ta un categoria cu nan ta dispuesto pa gasta mas aden. Saludabel pa Millenials no kiermen djis pa no ta malo, e ta bay mas pa come mas saludabel a base diario. Esaki ta bay man den man tambe cu cantidad di consumo di tabaco, sigaria y alcohol, cual nan ta desaproba.
Asina tin un bista riba solamente algun di e custumbernan di e generacion Millennials aki cu ta mustra segun expertonan di lo haci cambionan grandi den e economia.
Sigur tambe locual cu a resalta segun expertonan na SOIC ta cu Millenials ta constantemente busca experiencianan nobo. Den cual esunnan mas hoben ta pusha nan mayornan pa cu ta di e generacion anterior pa sali for di nan zona comodo y haci cosnan cu nan, cual ta inclui biahenan y actividadnan mas cu mas aventura y tambe variacion den destinacion di biahe. Hotelnan mundialmente tin bista riba esaki y tin algun hotel cu ta remodela tur aña pa asina brinda huespednan cada aña un otro experiencia a pesar cu nan ta bay e mesun hotel tur aña.
