E denuncia di gobierno di Nicolás Maduro di e contrabanda di mineralnan strategico pa e islanan Hulandes, cu a conduci na cera frontera pa comunicacion aereo y maritimo cu Curaçao, Aruba y Bonaire, a ser cuestiona pa Asamblea Nacional (AN) y fuente di e Corporacion Venezolano di Guayana (CVG), ya cu ta e militarnan cu ta controla e actividad minero cu consentimento di gobierno.  

“Nan ta bay cu e oro, coltan, diamante, producto alimenticio,” e mandatario a sigura dia 3 di januari, ora el a anuncia e medida. 

“No tin operacion di coltan, oro o diamante cu e Forsa Arma Nacional Bolivariano (FANB) no ta controla, pa cual e contrabanda di mineral ta auspicia, orkestra y ehecuta pa integrante di FANB,” asina e diputado di AN pa estado Bolivar, Américo de Grazia, a sigura. El a indica cu militarnan tambe ta controla e rutanan di comunicacion via tera, awa, y aire via cual ta saca e mineralnan precioso y strategico ilegalmente. 

De Grazia a insisti cu e motibo di e medida di gobierno di cera comunicacion cu e islanan Hulandes no ta e contrabanda di mineral for di Bolivar, sino un pretexto ya cu e situacion aki nan por a supera desde basta tempo caba, aplicando ley riba e culpablenan, sea militar o civil. 

“Desde AN reiteradamente nos a denuncia e contrabanda di mineralnan precioso y strategico, no pa e islanan Hulandes so, pasobra nan ta bay tambe pa Trinidad y Tobago, Panama, Colombia, Guyana y Brasil,” e diputado Jorge Millán, miembro di e Comision di Energia, Petroleo y Mineria ta observa. Tocante e situacion aki, Millán a comenta cu gobierno no a haci nada pa detene e funcionario y miembronan involucra di FANB.  

Dia 15 di december Asamblea Nacional a aproba den sesion plenario un informe cu ta declara nulidad di e decreto 2.248 di Ehecutivo, cu ta crea e ‘Arco Minero’ pa explotacion di un superficie di 112.000 kilometro cuadra cu ta abarca Bolivar, Amazonas y Delta Amacuro. “Gobierno di Nicolás Maduro a anuncia cu ‘bombos y platillos’ un afluencia masivo di capital y empresa a traves di e decreto 2.248, pero en realidad e tabata solamente un yamado iresponsable cu a profundisa criminalidad den henter estado Bolivar y e enfrentamento y rivalidad entre ‘pranes’ (lidernan di pandiya), forsanan arma, y mineronan, aumentando desempleo, pobresa, enfermedad, problema di suministro electrico, daño ambiental, falta di gas, desnutricion infantil, crisis sanitario y endeudamento estatal,” e informe ta señala. 

El a agrega cu “na Bolivar crimen y masacre a aumenta fuertemente den e zonanan minero, mientras ya ta comun pa observa, cada biaha cu mas frecuencia, e participacion activo di e cuerponan di seguridad di Estado den cualkier di su modalidadnan.” 

Fuentenan cerca di e Corporacion Venezolano di Guayana, cu a pidi pa no menciona nan nomber, a sigura cu “e militarnan ta den e extraccion di oro, coltan y diamante cu ta explota na Guayana, ademas di e traslado y comercialisacion di e produccion ey.” 

Un di e fuentenan a precisa cu “den e actividad minero ta maneha hopi negoshi scur, entre militar, pranes y mafia cu ta saca e produccion di e pais sin declara esaki na e autoridadnan competente.” 

“Militarnan di alto rango ta dedica na cumpra finca y tereno den e zona di El Manteco, unda e yacimentonan di coltan ta, pa explota y saca esaki di contrabanda,” asina e fuente a sigura. 

Otro fuente a revela cu a traves di un mafia cu ta opera na Bolivar, e oro, diamante y coltan ta ser hiba Puerto Cabello (Carabobo) y di eynan pa e islanan den Caribe. “Ta resulta contradictorio cu e ciere lo ta pa detene e contrabanda si bo por para esey cu e vigilancia y control adecua den e minanan,” el a bisa.  

De Grazia a deplora e falta di transparencia den e informacion oficial encuanto e actividad minero manera e caso di oro, den cual Minerven, empresa di CVG, ta esun encarga pa ley cu e produccion y entrega di e metal na Banco Central di Venezuela. 

El a agrega cu na 2006 Minerven a reporta un produccion di 480 kilo mensual di oro. Aña pasa el a cay te na entre 50 y 80 kilo pa luna, lo cual no ta cuadra cu e cifra cu gobierno a duna di conoce, di 8.531 kilo na 2017. 

E diputado a bisa cu e volumen ey, cu no ta produci pa Minerven, ta bin den su mayoria di loke e militar y funcionarionan ta kita di e mineronan chikito, anto solamente parti di e produccion di e empresanan Surafricano, Chines y Ruso, na cualnan gobierno a duna concesion na margen di ley y Constitucion den e Arco Minero, ta keda na Venezuela.