![Militares controlan estaciones de combustible en Bolivia para evitar desvío al contrabando](https://www.bondia.com/wp-content/uploads/2024/06/BOLIVIA-14-JUN-2024-NOTA-2_result-696x464.jpg)
DW) – Forsa Arma di Bolivia ta controlando algun stacion di benta di combustibel for di diaranson ultimo cu e fin di stop e desvio di diesel y gasolin pa contrabanda na e paisnan bisiña, mientras e protesta social pa falta di dollar ta continua y tambe pa aumento di costo di comestibel.
Stacionnan di servicio di e principal ciudadnan di e pais for di diaranson marduga ta conta cu vigilancia di militarnan, mientras e benta regular di combustibel ta tuma luga y sin e rijnan cu tabatin pa varios dia.
“Tin un despliegue di militarnan pa por yuda den control di algun stacion di gasolin,” vice-minister di Defensa Civil, Juan Carlos Calvimontes a confirma. E funcionario a señala cu nan presencia ta pa “controla” cu e trucknan cu ta transporta combustibel y esnan cu ta cumpra, no tin un “carga adicional” di diesel of gasolin pa rebende.
E costo di e liter di diesel y gasolin na Bolivia ta di 3,7 Boliviano (0,54 dollar), un prijs menor cu paisnan bisiña, pa loke tin persona cu ta probecha di rebende e dos combustibel aki na frontera pa haya ganashi.
Di su parti, presidente Boliviano Luis Arce, a indica cu “speculacion” y “interes politico personal” a ocasiona problema den distribucion normal di diesel y gasolin, hunto cu aumento di productonan manera tomati, siboyo y aros.
E mandatario a dispone pa reforsa e controlnan na e puntonan di frontera pa Argentina y Peru pa evita contrabanda di cuminda di Bolivia pa e paisnan aki, ademas el a comprometi su mes “pa garantisa e poder adkisitivo di e poblacion.”
Igualmente, varios sector a subi caya exigiendo pa Gobierno duna un solucion pa halto costo di productonan di prome necesidad, ademas pa escasez di dollar y combustibel.
E gruponan di comerciante a cumpli e di dos dia di marcha cu a sali di e poblacion di Patacamaya pa yega na La Paz, sede di Gobierno y Parlamento, dia 17 di juni.
Na Sucre, e capital constitucional di Bolivia, personanan di e hunta di bisiña a mobilisa contra aumento di prijs di comestibel y otro productonan esencial, mientras cu na Potosi e gruponan di comerciante tambe a marcha cu e mesun exigencianan.
Aumento di prijs di algun comestibel y falta di combustibel ta coincidi cu ausencia di dollar y restriccionnan di e sistema financiero pa cambia divisa for di varios luna caba.
For di 2023 Bolivia ta bin sufriendo un falta di likides di divisa, algo cu a coincidi cu rapportnan oficial cu ta mustra un reduccion den Reservanan Internacional Neto (RIN), cu na 2014 a yega te 15.122 miyon dollar.
Ultimo rapport di Banco Central di Bolivia (BCB) a indica cu RIN a yega na 1.796 miyon dollar te 30 di april ultimo, cu un aumento di 87 miyon compara cu e cifra di 1.709 miyon alcansa na final di 2023.
Segun economista Jose Gabriel Espinoza ta sigura, gobierno di MAS a consumi tur reserva internacional sin tuma medida pa stop e caida. Na tal punto cu BCB no ta dispone di likides suficiente pa enfrenta e obligacionnan cu Bolivia tin,” organismonan internacional y calificadonan di riesgo ta bisa.